Austria mund të pezullojë vaksinimin e detyrueshëm – anulohet Lotaria e Vaksinimit

Paratë e Lotarisë së Vaksinimit duhet të shkojnë për punonjësit e shëndetësisë, policinë dhe ushtrinë

Kancelari i Austrisë, Karl Nehammer, nuk përjashton mundësinë e pezullimit të vaksinimit të detyrueshëm, pasi gjithnjë e më shumë politikanë dhe ekspertë janë duke ia kërkuar që të bëjë këtë. Nëse ekspertët e qeverisë janë pro pezullimit të ligjit, do ta bëjmë këtë, sqaroi Nehammer në një intervistë për “Krone Zeitung” të dielën, transmeton albinfo.at.

Ai gjithashtu anuloi përfundimisht Lotarinë e Vaksinimit dhe propozon që paratë që ishin destinuar të shpërndahen sipas shortit për të vaksinuarit, t’u jepen personave të cilët kanë qenë në ballë të pandemisë.

Konkretisht ai përmend personelin shëndetësor dhe infermierisë, por edhe ushtrinë e policinë. Nehammer, për këtë ka filluar edhe bisedimet edhe me partnerin e koalicionit, partinë e Gjelbër. “Lotaria e Vaksinimit ishte një dëshirë e socialdemokratëve. Ata donin që të shpërndahet ky bonus motivues dhe që kjo të bëhet përmes ORF-it. Për mua ishte e natyrshme t’i përgjigjesha kërkesës. Por nuk është e realizueshme ashtu siç e imagjinonin socialdemokratët”, tha Nehammer në një raportim për media, përcjell albinfo.at.

Për sa i përket vaksinimit të detyrueshëm, kancelari austriak thekson se ligji gjithsesi është në shqyrtim. “Pikërisht këtë kërkojnë tani edhe qeveritarët e “Land”-eve. Për sa kohë që ekspertët e Komisionit thonë: “Po, vaksinimi është metoda e vetme për mbrojtje”, detyrimi për të vaksinuar sigurisht që do të mbetet në fuqi”, tha kancelari. Por nëse ekspertët e qeverisë sugjerojnë anulimin e ligjit, do ta bëjmë atë.

Megjithatë, konsultimet mes Qeverisë federale dhe qeverive të “Land”-eve të Austrisë  për korona do të zhvillohen të mërkurën. Sigurisht se aty do të diskutohet edhe tema për vaksinimin e detyrueshëm.

Në anën tjetër, ministrja e Ekonomisë, Margaret Schramböck, gjatë një prononcimi për ORF ka theksuar se të mërkurën do të diskutohet edhe për anulimin e testeve falas të koronës.

 

---