Austri: 19-vjeçari nga Maqedonia “donte të shkaktonte sa më shumë vrasje në koncertin e Swift dhe ta hidhte veten në erë”

Mediat austriake shkruajnë se dy të dyshuarit, të cilët u arrestuan pak para koncerteve në Vjenë të superyllit amerikan Taylor Swift (34), kanë rrëfyer se kishin planifikuar një sulm terrorist përpara stadiumit Ernst Happel që nga korriku. Ata donin të shkaktonin gjakderdhje me një mjet shpërthyes të bërë vetë. I dyshuari kryesor (19), që sipas mediave atje është një shqiptar nga Maqedonia e Veriut, ka dashur të hedhë veten në erë.

Siç konfirmoi policia në një konferencë të fundit për shtyp, një islamist (19) nga Ternizi (Austri e Ulët) dhe bashkëpunëtori i tij (17), të cilët u arrestuan në Vjenë, kanë pranuar se kishin planifikuar një sulm terrorist në një koncert të ikonës së popit Taylor Swift. Ata donin të shkaktonin një gjakderdhje në emër të të ashtuquajturit “Shteti Islamik” (IS) me sa më shumë vdekje në mesin e 20,000 tifozëve të pritur para stadiumit.

19-vjeçari nga Austria e Poshtme, i cili më parë kishte jetuar në Vjenë, deklaroi se donte të vriste të tjerët me armë therëse dhe të hidhte veten në erë me një mjet shpërthyes.

Sipas fqinjëve, pamja e të riut kishte ndryshuar tërësisht gjatë vitit të kaluar, dhe së fundmi ai kishte një “mjekër talebane”, siç tha një dëshmitar. Një e re plotësisht e mbuluar së fundmi është parë më shpesh para shtëpisë së prindërve të 19-vjeçarit.

Dy bashkëpunëtorë të tjerë mësohet se i përkisnin rrjetit të atentatorit të penguar. Ata me sa duket janë fshehur dhe një kërkim në mbarë Evropën për ta është duke u zhvilluar. Ato mund të jenë arsyeja pse policia vazhdoi të merrte një “rrezik abstrakt” edhe pas pengimit të sulmit të mundshëm.

Pas kësaj deklarate, organizatorët vendosën të anulojnë koncertet vjeneze Swift.

Për sulmin e planifikuar terrorist islamik në Vjenë, ku është arrestuar edhe një 19-vjeçar i dyshuar me origjinë shqiptare, ka reaguar edhe kancelari austriak, Karl Nehammer, i cili tha se situata rreth sulmit terrorist të planifikuar ishte shumë e rëndë, ndërsa shtoi se u parandalua një tragjedi.

Nehammer ka shkruar në rrjetin social “X” se gjendja rreth sulmit të planifikuar terrorist ishte shumë e rëndë, dhe se është parandaluar një tragjedi, kjo falë bashkëpunimit intensiv të policisë austriake dhe shërbimeve të huaja.

Ai tutje ka shtuar se po jetojmë në një kohë, ku po përdoret dhuna si mjet për të luftuar mënyrën perëndimore të jetesës, dhe se terrorizmi islamik kërcënon sigurinë dhe lirinë në shumë vende perëndimore.

“Terrorizmi islamik kërcënon sigurinë dhe lirinë në shumë vende perëndimore. Pikërisht për këtë ne nuk do të heqim dorë nga vlerat tona si liria dhe demokracia, por do t’i mbrojmë ato edhe më me forcë. Këto vlera janë themeli i shoqërisë sonë dhe na bëjnë të qëndrueshëm ndaj ekstremizmit dhe terrorizmit”, ka thënë ndër të tjera kancelari austriak.