Arrihet armëpushimi mes Indisë dhe Pakistanit

Pas ditëve të përleshjeve të armatosura, të dy vendet kanë arritur një armëpushim të menjëhershëm teksa raportohet se u ndërmjetësua nga Shtetet e Bashkuara të Amerikës.

India dhe Pakistani kanë rënë dakord për një armëpushim të menjëhershëm, duke i dhënë fund – të paktën tani për tani – një nga përshkallëzimi ushtarak më seriozi midis dy vendeve në dekada. Marrëveshja u njoftua nga Presidenti i SHBA-së, Donald Trump, i cili e përshkroi atë si një marrëveshje të arritur “pas një nate të gjatë bisedimesh të ndërmjetësuara nga SHBA-ja”. Armëpushimi më vonë u konfirmua nga qeveritë pakistaneze dhe indiane.

Pak orë më parë, Pakistani kishte nisur një ofensivë ushtarake kundër Indisë. Operacioni, i quajtur Bunyanun Marsoos (“mur i pathyeshëm”), shënjestroi disa instalime ushtarake indiane, duke përfshirë aeroportin Pathankot, bazën ajrore të Udhampur, një depo raketash në Beas, afër Amritsar, dhe objektiva të tjerë strategjikë në Kashmir. Sipas ushtrisë pakistaneze, një depo furnizimi në Uri dhe pozicionet e artilerisë në Derangyari u goditën gjithashtu. Kryeministri Shehbaz Sharif e quajti ofensivën “një përgjigje me vend” për t’u hakmarrë për “vdekjet e pafajshme”, transmeton albinfo.ch.

Hakmarrja erdhi pasi Islamabadi akuzoi Nju Delhin se kishte goditur me raketa tre baza të Forcave Ajrore pakistaneze në provincën Punjab. Në Indi, ushtria raportoi sulme të reja nga Pakistani, duke përfshirë edhe me dronë, përgjatë kufirit perëndimor. Shpërthime u dëgjuan në Srinagar dhe Jammu dhe policia konfirmoi vdekjen e të paktën pesë civilëve.

Kishte gjithashtu viktima të shumta në frontin pakistanez: qeveria e Kashmirit të administruar nga Islamabad raportoi 11 civilë të vrarë, duke përfshirë një fëmijë dhe katër gra, në bombardimet gjatë natës nga India.

Në mes të përshkallëzimit, Guardian raportoi se kryeministri Shehbaz Sharif mund të mbledhë Autoritetin e Komandës Kombëtare – organi që mbikëqyr arsenalin bërthamor të Pakistanit. Lajmi u mohua më vonë nga ministri i Mbrojtjes Khawaja Asif, i cili megjithatë deklaroi se Pakistani ishte i gatshëm të përballej me “një nivel të ri konflikti”, ndërsa mbeti i disponueshëm për një de-përshkallëzim “përmes bisedimeve serioze”.

---