Arrestohet në Prishtinë një shtetas gjerman i kërkuar nga INTERPOL-i

Policia e Kosovës ka arrestuar në Prishtinë një shtetas gjerman, i cili ishte në kërkim ndërkombëtar përmes INTERPOL-it, bazuar në një urdhër arresti të lëshuar nga autoritetet e Republikës Federale të Gjermanisë.

Sipas njoftimit të Policisë së Kosovës, arrestimi është kryer më 13 korrik nga Drejtoria për Bashkëpunim Ndërkombëtar Policor, përkatësisht Sektori FAST, pas pranimit të informatave operative për vendndodhjen e të dyshuarit me inicialet F.R.

I arrestuari dyshohet se kërkohej për veprën penale të “trafikimit të paligjshëm të substancave narkotike”, vepër e paraparë dhe e dënueshme sipas Kodit Penal Gjerman.

Me vendim të prokurorit kujdestar nga Prokuroria Themelore, të dyshuarit i është caktuar masa e ndalimit prej 48 orësh. Ndërkohë, procedurat e mëtejme do të vazhdojnë nga Drejtoria për Bashkëpunim Ndërkombëtar Policor – ILECU, në koordinim me institucionet përkatëse të drejtësisë.

Policia e Kosovës ka theksuar se mbetet e angazhuar në bashkëpunimin ndërkombëtar policor dhe në zbatimin e urdhër-arresteve ndërkombëtare, me qëllim të luftimit të krimit dhe forcimit të sundimit të ligjit.