Ambasadori gjerman: Radoiçiq do të arrestohej nëse hyn në territorin e Gjermanisë

Ambasadori i Gjermanisë në Kosovë, Reiner Rudolph, ka ritheksuar qëndrimin e Berlinit se të gjithë personat përgjegjës për sulmin e armatosur në Banjskë, të ndodhur në shtator të vitit 2023, duhet të përballen me organet e drejtësisë.

Duke komentuar rastin e Milan Radoiçiqit, të cilin autoritetet e Kosovës e konsiderojnë organizator të sulmit, Rudolph deklaroi se Gjermania e ka dënuar ashpër këtë ngjarje dhe vazhdon të kërkojë që përgjegjësit të mbahen përgjegjës.

“Gjermania e ka dënuar sulmin me gjuhën më të ashpër dhe mbetet në qëndrimin se autorët duhet të dalin para drejtësisë. Jemi në dijeni se Kosova ka lëshuar një fletarrestim ndërkombëtar, i cili është ende në fuqi, dhe kjo duhet të zbatohet”, tha ambasadori.

I pyetur në emisionin “Info Magazine” në Klan Kosova nëse Milan Radoiçiq do të ekstradohej në Kosovë në rast se do të hynte në Gjermani, Rudolph u përgjigj se ai fillimisht do të ndalohej nga autoritetet gjermane.

“Ai do të ndalohej, natyrisht”, u shpreh ambasadori gjerman.