Ambasada e Kosovës në Bernë me njoftim të rëndësishëm për votimin me postë në Zvicër

Bashkatdhetarëve u kërkohet që zarfet me fletëvotime të mos i dërgojnë në ambasadë apo konsullata

Ambasada e Republikës së Kosovës në Bernë ka publikuar një njoftim të rëndësishëm për të gjithë shtetasit kosovarë në Zvicër që kanë zgjedhur votimin me postë për Zgjedhjet e Parakohshme për Kuvendin e Kosovës, transmeton albinfo.ch.

Sipas njoftimit, adresa e vetme ku duhet të dërgohen zarfet me fletëvotime është:

KQZ-ZGJEDHJET

POSTFACH

3024 Bern

Autoritetet diplomatike kanë bërë thirrje që qytetarët të mos i dërgojnë zarfet në adresën e Ambasadës së Kosovës në Bernë apo në konsullatat në Gjenevë dhe Cyrih, pasi ato nuk janë të autorizuara për pranimin e votave me postë.

“Ju lutemi, MOS i dërgoni zarfet me fletëvotime në adresën e Ambasadës së Republikës së Kosovës në Bernë apo në Konsullatat në Gjenevë dhe Cyrih, por në adresën e lartcekur”, thuhet në njoftimin e Ambasadës së Kosovës në Bernë.

Po ashtu, ambasada ka shkruar se zarfi i votimeve per zgjedhjet e parakohshme, i cili duhet të dorëzohet në kutinë postare (KQZ-ZGJEDHJET, POSTFACH, 3024 Bern), për shkak të madhësisë së tij duhet të ketë pullë postare me vlerë prej 2 CHF.

Ambasada u ka bërë thirrje bashkatdhetarëve që të respektojnë udhëzimet zyrtare, në mënyrë që procesi i votimit të zhvillohet pa pengesa dhe votat të arrijnë në kohë./Albinfo.ch

---