Aktori me origjinë shqiptare Dashmir Ristemi në rolin kryesor të filmit të ri zviceran “Von dem, was bleibt”

Më 18 qershor nis shfaqjen në kinematë e Zvicrës gjermanishtfolëse filmi i ri zviceran “Von dem, was bleibt” (“Nga ajo që mbetet”), me regji të regjisores nga Cyrihu, Lisa Blatter. Filmi është prezantuar tashmë në festivale të njohura ndërkombëtare dhe tani vjen për publikun e gjerë në kinematë zvicerane, shkruan albinfo.ch.

Në qendër të historisë janë Selma (Carla Juri) dhe Nori (Dashmir Ristemi), një çift që pret fëmijën e tyre të parë. Pas një nate misterioze, Nori zgjohet i lënduar dhe pa asnjë kujtim për orët e fundit. Amnezia e pashpjegueshme dhe një humbje e rëndë vënë në provë marrëdhënien e tyre, duke e çuar çiftin përballë sfidave të mëdha emocionale.

Filmi është veçanërisht interesant edhe për komunitetin shqiptar në Zvicër, pasi rolin kryesor mashkullor e interpreton aktori Dashmir Ristemi, i cili ka prejardhje shqiptare. Po ashtu, edhe familja e personazhit që ai luan në film është shqiptare, duke sjellë në ekran elemente të identitetit dhe kulturës shqiptare në kuadër të një produksioni zviceran.

Premierat e filmit me praninë e regjisores dhe aktorëve do të zhvillohen më 16 qershor në kinemanë FFA në Aarau, më 17 qershor në kinemanë Riffraff në Cyrih dhe më 18 qershor në kinemanë Rex në Bernë.

Sipas producentëve, janë të mundshme edhe intervista me aktorin Dashmir Ristemi dhe regjisoren Lisa Blatter. Gjithashtu, janë në dispozicion materiale promocionale dhe fotografi nga filmi.

“Von dem, was bleibt” pritet të tërheqë vëmendjen e publikut jo vetëm për temën e tij dramatike dhe emocionuese, por edhe për përfshirjen e komunitetit shqiptar në një prodhim të rëndësishëm të kinematografisë zvicerane.

Biletat: https://www.riffraff-houdini.ch/de-ch/film/von-dem-was-bleibt.html