Aksidentohet autobusi nga Kosova në Gjermani, 30 të lënduar

Sipas policisë, 30 persona u plagosën në aksident. Dy pasagjerë u shtruan në spital dhe katër të tjerë u transferuan në klinika për vlerësim të mëtejshëm

30 persona janë lënduar pasi një autobus nga Kosova që po transportonte udhëtarë drejt Munihut është aksidentuar me një kamion në Gjermani.

Siç raportojnë mediat gjermane, aksidenti ka ndodhur gjatë natës derisa në autobus ishin 50 pasagjerë.

Dy prej të lënduarve raportohet se janë në gjendje të rëndë.

Rosenheim 24 raporton se autostrada u mbyll plotësisht në drejtim të Munihut për rreth dy orë, transmeton albinfo.ch.

Kamioni, i drejtuar nga një polak 46-vjeçar, që po barte perime po udhëtonte drejt Munihut gjithashtu.

“Autobusi, që transportonte pasagjerë nga Kosova, u përplas me pjesën e pasme të rimorkios pavarësisht manovrave të shmangies. Pjesa e përparme e autobusit u ngjit në kamion dhe pësoi dëme të mëdha. Rimorkioja u dëmtua gjithashtu rëndë”, raporton media gjermane.

Sipas policisë, 30 persona u plagosën në aksident. Dy pasagjerë u shtruan në spital dhe katër të tjerë u transferuan në klinika për vlerësim të mëtejshëm.

---