Aeroporti i Tiranës ofron linjë të veçantë për familjet dhe gratë shtatzëna

Aeroporti Ndërkombëtar i Tiranës “Nënë Tereza” ka krijuar një linjë të dedikuar për familjet dhe kategori të veçanta udhëtarësh, me qëllim që procedurat para fluturimit të zhvillohen më lehtë dhe në kushte më komode.

Sipas njoftimit të aeroportit, këtë shërbim mund ta përdorin familjet që udhëtojnë me fëmijë, gratë shtatzëna, si dhe pasagjerët që kanë me vete karroca fëmijësh.

Linja e posaçme synon të reduktojë vështirësitë gjatë kalimit në procedurat aeroportuale dhe t’u ofrojë këtyre udhëtarëve një proces më të qetë përpara nisjes.

Aeroporti i Tiranës bën të ditur se kjo masë është pjesë e përpjekjeve për përmirësimin e shërbimeve dhe krijimin e një eksperience më të përshtatshme për nevojat e ndryshme të pasagjerëve.