Abdixhiku i drejtohet mërgatës: “Më 28 dhjetor, ejani dhe shpëtojeni Kosovën”

“Më 28 dhjetor, ejani në Kosovë. Ejani me avionë. Ejani me autobusë. Ejani me vetura. E po qe nevoja, ejani edhe në këmbë...

Kryetari i Lidhjes Demokratike të Kosovës (LDK) dhe kandidati për kryeministër, Lumir Abdixhiku, ka zhvilluar sot, më 14 dhjetor 2025, një takim me bashkatdhetarët shqiptarë në Grenchen të Zvicrës, në kuadër të mobilizimit të votës së diasporës për zgjedhjet e ardhshme.

Takimi është mbajtur në Grenchen, me fillim nga ora 15:30, nën sloganin “Takim me bashkatdhetarë – Zvicër”, dhe është organizuar nga LDK-ja.

Gjatë fjalimit të tij, Abdixhiku u ka bërë thirrje të fuqishme mërgimtarëve që të angazhohen drejtpërdrejt në procesin zgjedhor, duke theksuar rëndësinë vendimtare të diasporës për të ardhmen e Kosovës.

“Më 28 dhjetor, ejani në Kosovë. Ejani me avionë. Ejani me autobusë. Ejani me vetura. E po qe nevoja, ejani edhe në këmbë. Ejani si të doni; por atë ditë, shpëtojeni Kosovën. Sepse atë ditë, Kosova ka nevojë për secilin prej jush. Kosova ka nevojë për shpresë. LDK ju thërret! LDK ju pret!”.

Abdixhiku theksoi se LDK synon rikthimin e shpresës, stabilitetit dhe zhvillimit institucional, duke e parë mërgatën si një shtyllë kyçe të ndryshimit politik dhe demokratik në vend.

Në këtë takim u bë e ditur gjithashtu se LDK ka kandiduar Ramadush Eminin, afarist shqiptar i suksesshëm në Zvicër për deputet nga Zvicra, si përfaqësues i drejtpërdrejtë i diasporës shqiptare, duke synuar që zëri i mërgatës të ketë përfaqësim të denjë në Kuvendin e Kosovës.

Takimi në Grenchen u vlerësua si një nga organizimet më mobilizuese të LDK-së në Zvicër, duke dëshmuar interesimin dhe gatishmërinë e mërgatës për t’u përfshirë aktivisht në proceset politike të Kosovës.

Lexo po ashtu:

Kurti sot, Abdixhiku nesër: takime në Zvicër për të kërkuar votat e mërgatës

---