A mund të sëmureni nga klima? Ja çfarë thotë shkenca

Ekspertët thonë se ajri i ftohtë nuk shkakton drejtpërdrejt ftohje, por klimatizimi mund të irritojë rrugët e frymëmarrjes

Me temperaturat e larta të verës, shumë njerëz e lidhin dhimbjen e fytit, kollën apo lodhjen me qëndrimin në ambiente me klimë. Por sipas ekspertëve, klimatizimi nuk shkakton drejtpërdrejt ftohje, grip apo pneumoni. Për një infeksion nevojiten patogjenë, si viruse, baktere apo kërpudha.

Megjithatë, qëndrimi për shumë kohë në ambiente të klimatizuara mund të shkaktojë shqetësime si tharje të syve, irritim të fytit, kollë të lehtë apo dhimbje koke. Kjo ndodh sepse ajri i ftohtë dhe i thatë mund të thajë mukozën e hundës, fytit dhe syve, duke dobësuar përkohësisht mbrojtjen natyrore të rrugëve të frymëmarrjes, transmeton albinfo.ch.

Rreziku më i madh lidhet me pajisjet e mirëmbajtura keq. Filtrat e ndotur ose lagështia në sistemet e ventilimit mund të krijojnë kushte për zhvillimin e baktereve dhe mykut. Në raste të caktuara, kjo mund të çojë edhe në infeksione më serioze, si sëmundja e legjionarëve.

Ekspertët nuk rekomandojnë shmangien totale të kondicionerëve, pasi edhe temperaturat shumë të larta në ambiente të brendshme mund të jenë të rrezikshme, sidomos për të moshuarit, fëmijët e vegjël, gratë shtatzëna dhe personat me sëmundje kronike.

Zgjidhja më e mirë është përdorimi i kujdesshëm: mirëmbajtja e rregullt e pajisjeve, pastrimi i filtrave, ajrosja e ambienteve dhe shmangia e drejtimit të ajrit të ftohtë direkt në trup.

---