Dita e Flamurit bashkon nxënësit e shkollave shqipe në Cyrih

Diskoteka më e njohur shqiptare në Zvicër, Rinora 4, të dielën ishte mbushur me nxënës të shkollave shqipe të Cyrihut, të cilët ishin veshur “kuq e zi” për të shënuar Ditën e Flamurit dhe Pavarësinë e Shqipërisë.

Nxënësit e shkollave shqipe ishin bërë bashkë të dielën për të festuar Ditën e Flamurit dhe Pavarësinë e Shqipërisë.

Një festë e tillë ishte organizuar nga Lidhja e Arsimtarëve dhe Prindërve Shqiptarë për kantonin Cyrih, e cila tashmë i ka bërë tradicionale manifestimet e tilla me karakter kulturor dhe kombëtar, të cilat i feston për çdo vit së bashku me nxënësit e shkollave shqipe dhe prindërit e tyre nga kantoni i Cyrihut.

Nxënësit janë shoqëruar nga prindërit e tyre, ndërsa ishin të pranishëm edhe mysafirë të tjerë nga Kantoni Cyrih, por edhe nga kantonet e tjera për rreth, të cilët edhe janë shërbyer me ushqime dhe pije falas.

Në fillim në skenë u ngjiten fëmijët e shkollave shqipe për të intonuar himnin e flamurit kombëtar, nën dirigjimin e mësuesit Hasan Spahiu.
Pastaj fillon pjesa zyrtare me fjalime, të cilës i priu nikoqiri Naser Ulaj, kryetar i LAPSH-it për Kantonin e Cyrihut.

Ai foli për datat më të rëndësishme të nëntorit: 28 Nëntorin dhe Pavarësinë e Shqipërisë, ndërsa ka thënë se si mësuesit, por edhe prindërit e kanë obligim moral dhe kombëtar që këta fëmijë ta ruajnë kulturën dhe traditat tona, duke ndjekur shkollën shqipe si mjeti më i rëndësishëm kundër asimilimit, i cili, sipas tij, po na kërcënon dita- ditës, sepse gjuha është shtylla e kombit.

Të pranishmit i përshëndeti edhe kryetari i LAPSH-it për Zvicër, Nexhat Maloku. Ai ka njoftuar të pranishmit për kohën e regjistrimit të fëmijëve në shkollat shqipe, që sipas tij, janë muajt nëntor dhe dhjetor.

Më pas Konsulli i Republikës së Kosovës në Cyrih, Islam Spahiu dhe Shukrije Ramadani nga Qendra Kulturore e Kosovës, me nga një fjalë rasti kanë përshëndetur të pranishmit, duke falënderuar LAPSH-in për punën e çmuar dhe mundin që po jep në ruajtjen e gjuhës dhe kulturës shqiptare.

Më pas është përkujtuar me disa fjalë edhe mësuesja e LAPSH-it, Antoneta Subashi – Alia, e cila kishte ndërruar jetë ditë më parë pas një sëmundjeje të rëndë.

Pastaj ka vazhduar programi artistik, i përgatitur kryesisht nga nxënësit me recitale, vjersha dhe këngë, duke e plotësuar edhe ansambli “Trojet”, i cili u paraqit me disa valle të bukura shqipe.

Pjesa e dytë e programit ishte rezervuar me muzikë popullore, duke i ftuar të gjithë të pranishmit në vallëzim.

Të gjithë së bashku, mësues, nxënës, prindër dhe mysafirë të tjerë, u kënaqën nën tingujt e muzikës deri në orët e vona të mbrëmjes.