Maurer kërkon më shumë siguri dhe ngritjen e një njësiti special

Këto masa duhen marrë pas rritjes së kërcënimit nga terrorizmi

Ministri zviceran i mbrojtjes Ueli Maurer ka pranuar se për sulmet terroriste të Parisit ka dëgjiar nga radioja dhe jo nga shërbimi informativ i vendit! Por përkundër kësaj, ai thotë se autoritetet e sigurimit kanë reaguar mirë në raport me atentatet.

“Gjendja është analizuar me të shpejtë, raportet e para janë bërë dhe gatishmëria është ngritur në shkallë më të lartë. Gjithçka është bërë mirë, me të gjitha mjetet që Zvicra ka në dispozicion.

Por, këto mjete duket se nuk mjaftojnë, për t`u përballur me kërcënimin në rritje. Për këtë arsye Maurer planifikon investime plotësuese në siguri, shkruan srf.ch.

“Shërbimi i sigurimit, rojet kufitare dhe policia janë të gjitha instrumente që duhen përforcuar në vitet në vijim”. Sa i përket shërbimit të sigurimit, ministri ka saktësuar se nevojiten edhe 100 vende pune ose ndoshta edhe më shumë. “Por ne duhet të kudjesemi më shumë për cilësinë se sa për sasinë”, ka tërhequr vërejtjen Maurer.

Ai ka përkujtuar se vendit i nevojitet edhe një njësi speciale në nivel nacional, pasi që deri tash njësitë e tilla kanë qenë kompetencë e kantoneve.