Ndërtimtarët kërkojnë të mos u hiqet pensioni me 60 vjet

Sot, në më shumë se 100 kantiere ndërtimi në Cyrih e rrethinë ka mbretëruar heshtje e plotë. Punëtorët e ndërtimtarisë, të udhëhequr nga sindikata Unia dhe Syna në këtë mënyrë, duke e lënë punën, kanë protestuar kundër paralajmërimeve për heqjen e të drejtës për pensionim në moshën 60 vjeçare në këtë degë ekonomike. Ata po kështu kanë kërkuar edhe mbrojtje më të mirë në rast pune në mot të ligë dhe po ashtz mbrojtje nga dumpingu i pagave.

Siç thuhet në një komunikatë të nënshkruar nga sindikatat Unia dhe Syna, punëtorët kanë vërejtje ndaj punëdhënësve gjegjësisht Federatës së Ndërtimtarëve të cilët nuk po i marrin seriozisht problemet e punëtorëve të kësaj dege dhe po i bllokojnë zgjidhjet.

Më shumë se 1000 punëtorë kanë ngrënë drekë të përbashkët në holin e madh të Stacionit Hekurudhor të Cyrihut.

Vetëm një ditë më parë, të hënën rreth 3000 punëtorë në kantonin e Tesinës kanë proteszuar po ashtu duke e lënë punën ndërsa për nesër parashihen aksione të ngjashme edhe në Zvicrën perëndimore, frankofone.