Sommaruga viziton një kamp të refugjatëve në Etiopi

(KEYSTONE/Dominic Steinmann)

Presidentja federale, Simonetta Sommaruga ka vizituar të dielën një kamp të refugjatëve (Sheder) në lindje të Etiopisë, me ç`rast ka bërë edhe përurimin e fillimit të punëve për një projekt zviceran  dedikuar shëndetësisë.
Duke përshëndetur angazhimin e Zvicrës, presidenti i regjionit Somali te Etiopisë i ka organizuar një pritje të përzemërt delegacionit të Sommaruga-s. Ai në fjalën e tij përshëndetëse, duke iu referuar vizitës dhe përurimit të projektit ka thënë se bëhet fjalë për një “ditë historike” për regjionin e tij, shkruan srf.ch.

Etiopia aktualisht është duke strehuar më shumë se 700 mijë refugjatë nga Somalia, Eritrea dhe Sudani. Vetëm kampi Sheder të cilin e ka vizituar Sommaruga u ofron strehim 14.000 vetave. Zvicra merr pjesë në mënyre indirekte në financimin e këtij kampi, permes organizatave të ndryshme humanitare.