Syze progresive me çmime që nisin nga 63 franga zvicerane. Platformat online që i dërgojnë drejtpërdrejt nga Kina po tërheqin gjithnjë e më shumë konsumatorë. Një test i televizionit publik zviceran RTS ka nxjerrë rezultate befasuese: cilësia e korrigjimit të shikimit është shumë e mirë, por mungesa e shërbimit profesional mund të përbëjë problem.
Në Zvicër, katër nga pesë persona përdorin tashmë syze ose lente kontakti. Për një palë syze me lente progresive, të cilat korrigjojnë edhe presbiopinë (dobësimin e shikimit nga afër që shfaqet zakonisht me moshën), çmimi në dyqanet tradicionale shpesh kalon 1.000 franga zvicerane.
Ky treg fitimprurës po tërheq gjithnjë e më shumë kompani që operojnë përmes shitjes online dhe dërgesave të drejtpërdrejta nga Azia. Duke i lidhur konsumatorët me linjat e prodhimit në Kinë, këto platforma arrijnë të ulin ndjeshëm kostot.
Ndër kompanitë më agresive në këtë treg është Blacksheep, e themeluar nga biznesmeni francez Pierre Wizman.
“Tregu e ka dëmtuar vetveten”, shprehet ai, duke argumentuar se çmimet artificialisht të larta të syzeve nga optikat tradicionale u kanë hapur rrugë konkurrentëve online. “Një palë syze nuk kushton shumë për t’u prodhuar”, thekson Wizman.
Por, a po marrin konsumatorët vërtet atë për të cilën paguajnë?
Testohen gjashtë palë syze nga Kina
Ekipi i emisionit zviceran “A Bon Entendeur” porositi gjashtë palë syze me lente progresive, me çmime që varionin nga 63 deri në 195 franga zvicerane.
Syzet iu nënshtruan një sërë testesh teknike në Departamentin e Oftalmologjisë të Spitaleve Universitare të Gjenevës (HUG).
Ekspertët vlerësuan disa nga elementet më të rëndësishme të syzeve: përputhjen e distancës ndërmjet bebëzave me parametrat e përdoruesit, saktësinë e dioptrisë dhe cilësinë e shtresës kundër reflektimit.
Rezultatet befasuese: Të gjitha kalojnë testin e korrigjimit
Rezultati i parë ishte pozitiv: të gjashtë palët e syzeve morën vlerësimin “shumë mirë” për saktësinë e distancës ndërmjet bebëzave dhe korrigjimin e dioptrisë.
Megjithatë, vetëm njëra prej tyre arriti të marrë vlerësimin maksimal në të gjitha kategoritë e testimit. Bëhet fjalë për syzet SmartBuyGlasses, të cilat ishin edhe më të shtrenjtat në test, me çmim prej 195,95 frangash.
Dy produkte të tjera morën vlerësimin “shumë mirë”:
– Firmoo: 72,15 franga.
– Aoolia: 108,30 franga.
Në këto dy raste, ekspertët konstatuan një fushë pak më të kufizuar të shikimit, për shkak të disa shtrembërimeve të vogla në pjesët anësore të lenteve.
Tri palët e tjera morën vlerësimin “mirë”:
– Blacksheep: 63,40 franga. U penalizua për cilësinë disi më të dobët të përpunimit.
– Zenni: 83,75 franga. Kishte mangësi në cilësinë e shtresës kundër reflektimit.
– Polette: 159,40 franga. Testuesit evidentuan tri vërejtje që, të marra së bashku, ndikuan në rezultatin përfundimtar.
Pavarësisht dallimeve të konstatuara, të gjitha syzet e testuara ofruan raport shumë të mirë ndërmjet çmimit dhe cilësisë.
“Absolutisht nuk e prisja një cilësi të tillë”, deklaroi drejtuesja e Departamentit të Oftalmologjisë në Spitalet Universitare të Gjenevës, profesoresha Gabriele Thumann.
Sipas saj, rezultatet janë lajm i mirë për pacientët, veçanërisht për ata që nuk kanë mundësi financiare të blejnë syze të shtrenjta.
“Disa persona, sidomos të moshuarit, kanë nevojë për korrigjim të përkryer të shikimit. Fatkeqësisht, ndodh që ata ta shtyjnë blerjen e syzeve të reja për shkak të pamundësive financiare”, shpjegon profesoresha Thumann.
Optikat tradicionale nuk ndihen të rrezikuar
Megjithëse platformat online po ofrojnë çmime dukshëm më të ulëta, optikat tradicionale nuk duket se janë të shqetësuara nga kjo konkurrencë.
Sipas Ilias Berdoz, drejtor komercial i kompanisë Berdoz Vision & Audition, shitja e syzeve përmes platformave online nuk është një fenomen i ri.
“Ky lloj shërbimi ekziston prej rreth 15 vjetësh në Shtetet e Bashkuara, por shumë shpejt është përballur me kufizimet e shitjes në distancë”, shprehet ai.
Sipas Berdoz, konsumatorët kanë nevojë për asistencë gjatë gjithë procesit të përzgjedhjes dhe blerjes së syzeve.
Optikani mund të kryejë matjet e nevojshme, t’i përshtatë syzet me formën e fytyrës së klientit dhe të ofrojë shërbim pas shitjes. Këto janë shërbime që platformat online nuk mund t’i garantojnë në të njëjtën mënyrë.
Syzet e porositura online nuk rekomandohen për fëmijët nën 8 vjeç
Një paralajmërim i veçantë vjen për përdorimin e syzeve të porositura online nga fëmijët e vegjël.
Sipas profesoreshës Gabriele Thumann, një devijim i vogël në parametrat e syzeve mund të shkaktojë vetëm lodhje të shikimit te një i rritur, por te fëmijët pasojat mund të jenë shumë më serioze.
“Foshnjat lindin me shikim të kufizuar, i cili zhvillohet gjatë viteve të para të jetës. Ky zhvillim varet nga stimujt që marrin sytë. Nëse këta stimuj nuk janë të duhur, fëmija mund të mos e zhvillojë kurrë shikimin në nivelin e plotë. Dhe kjo nuk mund të korrigjohet më vonë”, paralajmëron ajo.
Specialistja thekson se vetëm përshtatja fizike nga një optikan në laborator mund të garantojë që syzet të vendosen siç duhet në fytyrën e fëmijës.
Kjo përfshin rregullimin e mbështetëseve të hundës, lakimin e krahëve të syzeve dhe kontrollimin që fëmija të mos shikojë mbi kornizën e tyre.
Përfundimi: Syzet me lente progresive të prodhuara në Kinë mund të ofrojnë cilësi të mirë optike me çmime shumë më të ulëta se ato të dyqaneve tradicionale. Megjithatë, kursimi në çmim nuk duhet të vijë në dëm të matjeve profesionale, përshtatjes individuale dhe kontrollit të shikimit, veçanërisht te fëmijët.
