Zvicra dëbon më shumë azilkërkues nga Eritrea

Nëse në muajin qershor ishin shqyrtuar vetëm 24 kërkesa, në shtator ky numër është rritur në 772

Eritreanët, prej një kohe të gjatë përbëjnë numrin më të madh të refugjatëve që kërkojnë azil në Zvicër. Për shkak të situatës vazhdimisht problematike në atë vend afrikan dhe për shkak të rreziqeve të cilave u nënshtrohen refugjatët e Eritresë gjatë arratisë, ata kanë pasur siguri pothuaj të plotë që të mos dëbohen nga Zvicra. Një numër i madh i tyre po ashtu ka fituar edhe të drejtën e qëndrimit.

Por muajve të fundit kjo qasje ndaj tyre ka ndryshuar. Numri i kërkesave për azil të eritreanëve që i janë nënshtruar një shqyrtimi më të thelluar ka shënuar rritje të madhe në disa muajt e fundit. Kështu, nëse në muajin qershor ishin shqyrtuar vetëm 24 kërkesa, në shtator ky numër është rritur në 772.

Siç njofton televizioni i Zvicrës Romande RTS, ky shqyrtim i thelluar i kërkesave për azil bëhet për të lehtësuar mundësinë e kthimit të tyre në Itali, ku janë paraqitur për herë të parë për azil. Këtë e ka konfirmuar një zëdhë¨nëse e Sekretariatit Federal për Migracion (SEM).