10 vjet burg shqiptarit për vrasjen e bashkëkombësit para shtëpisë publike

Gjykata regjionale në Biel/Bienne, kantoni i Bernës ka dënuar të premten një shqiptar të Maqedonisë me dhjetë jet burg për vrasje me paramendim. Është konstatuar se ai ka vrarë një kosovar në parkingun e një shtëpie publike

Dy vjet më parë shqiptari 43 vjeçar nga Maqedonia pati vrarë bashkëkombesin e tij 39 vjeçar nga Kosova. Ky krim ka ndodhur në afërsi të një shtëpie publike (sexlub) në lokalitetin Lätti të komunës Rapperswil, të kantonit të Bernës. Sherri në mes të dy shqiptarëve kishte nisur deri sa ata ende ndodhesin brenda klubit, në bar.
Kosovari tashmë i ndjerë ishte aty së bashku me dy zviceranë, të cilët bashkë me prostitutat e lokalit kishin provuar t`i pajtonin palët në konflikt. Pastaj të tre shokët ishin nisur për në shtëpi por e kishin ndërruar mendjen dhe ishn kthyer në lokal për të kërkuar sqarime nga shqiptari i Maqedonisë, shkruan bernerzeitung.ch. Në parkingun e klubit konflikti ishte përshkallëzuar kështu që kosovari kishte marrë plagë të rënda nga thika, prej të cilave vdes pak më vonë në spital.
Sipas konstatimit të bërë nga trupi gjykues i Gjykatës Regjionale në Biel/Bienne, dorasi së pari e kishte goditur me thikë njërin nga shokët zviceranë të kosovarit, duke i shkaktuar plagë serioze në gjoks. Pastaj ai e ka therur kosovarin i cili nga plagët e marra ka vdekur në spital.
Shqiptari i Maqedonisë ka pranuar para trupit gjykues se kishte pasur me vete një thikë dhe se thika që policia e ka gjetur afër vendit të krimit, ka qenë e tij. Por ai thotë se nuk e di kush i ka shkaktuar therjet me thikë. Ndërkohë që për trupin gjykues është krejtësisht e sigurt se therësi është vet ai, transmeton albinfo.ch.
Kjo dëshmohet qartë edhe nga gjurmët e ADN-së, të gjetura përveç tjerash edhe në thikën në fjalë.
Prokurori ka kërkuar dënim me 12 vjet burg për vrasje ndërsa avokati i të akuzuarit është shprehur për shpalljen e pafajësisë së tij lidhur me akuzën kryesore, të vrasjes me paramandim. Sipas avokatit, klienti i tij kishte dashur vetëm të mbrohej nga tre personat që e kishin sulmuar. Në tollovinë e krijuar nuk mund të dëshmohet planifikimi i tij për të kryer vrasjen.