Kancelari gjerman, Friedrich Merz, ka bërë thirrje për vazhdimin e procesit të zgjerimit të Bashkimit Evropian drejt Ballkanit Perëndimor, duke theksuar se vendet e rajonit duhet të shohin përfitime konkrete nga integrimi evropian. Ai ka kërkuar gjithashtu që protestat dhe mospajtimet politike të trajtohen pa përdorimin e dhunës.
Gjatë fjalimit të mbajtur të enjten, më 22 tetor, në Samitin e Procesit të Berlinit në Mal të Zi, Merz iu referua protestave në Shqipëri dhe në vende të tjera të rajonit, duke theksuar rëndësinë e dialogut dhe respektimit të parimeve demokratike, përcjell albinfo.ch.
“Kur përballemi me protesta në BE apo këtu në rajon, dhuna nuk duhet të jetë kurrë një opsion, nga asnjëra palë”, deklaroi kancelari gjerman.
Merz theksoi se mesazhi që vjen nga qytetarët duhet të merret seriozisht nga udhëheqësit politikë. Sipas tij, zgjerimi i Bashkimit Evropian duhet të vazhdojë, ndërsa reformat dhe bashkëpunimi rajonal duhet të sjellin rezultate të prekshme për qytetarët e Ballkanit Perëndimor.
Në fjalimin e tij, kancelari gjerman u ndal edhe te marrëdhëniet ndërmjet Kosovës dhe Serbisë, duke theksuar rëndësinë e normalizimit të tyre për stabilitetin dhe përparimin e rajonit drejt integrimit evropian. Ai kërkoi angazhim konkret për tejkalimin e pengesave që vazhdojnë ta vështirësojnë këtë proces.
Merz paralajmëroi gjithashtu kundër retorikës përçarëse, polarizimit politik dhe glorifikimit të kriminelëve të luftës, duke nënvizuar se pajtimi, bashkëpunimi dhe respektimi i vlerave demokratike janë të domosdoshme për të ardhmen evropiane të rajonit.
Samiti i Procesit të Berlinit, i cili po mbahet në Mal të Zi, mbledh liderët e vendeve të Ballkanit Perëndimor dhe përfaqësues të shteteve evropiane, me synimin për të forcuar bashkëpunimin rajonal, lidhjet ekonomike dhe perspektivën e anëtarësimit në Bashkimin Evropian.
