Daniel Lampart, një nga ideatorët e pensionit të 13-të në Zvicër, thotë se financimi i kësaj pagese shtesë përmes tatimit mbi vlerën e shtuar (TVSH) është i drejtë, duke theksuar se pensioni i 13-të u ofron pensionistëve më shumë siguri financiare në një kohë kur kostoja e jetesës po rritet.
Në një intervistë për transmetuesin publik zviceran SRF, Lampart, kryeekonomist i Federatës së Sindikatave të Zvicrës (SGB), deklaroi se financimi i pensionit të 13-të nuk ishte përcaktuar në iniciativën e prezantuar në vitin 2018.
Sipas tij, në kohën kur iniciativa u lançua, nuk ishte e qartë se si do të ndikoheshin financat e sistemit zviceran të sigurimit të pleqërisë dhe familjarëve të të siguruarit (AHV), nëse propozimi do të miratohej.
Megjithatë, Lampart vlerëson se financimi përmes TVSH-së është i drejtë, pasi sistemi AHV ka një efekt të rëndësishëm rishpërndarës, duke kontribuar në shpërndarjen e të ardhurave në shoqëri.
Ai e konsideron pensionin e 13-të një sukses, pavarësisht mënyrës së financimit.
“Jemi në një situatë ku pagesat nga fondet pensionale po zvogëlohen, ndërsa kostoja e jetesës po rritet. Pensioni i 13-të i AHV-së sjell më në fund më shumë stabilitet në planifikimin financiar të pensionistëve”, tha Lampart.
Ai shtoi se vazhdon të takojë qytetarë që e vlerësojnë këtë masë dhe që theksojnë rëndësinë e saj për buxhetin familjar.
Pensioni i 13-të u bë një nga çështjet kryesore të politikës sociale në Zvicër, me debatet që përqendrohen si te rëndësia e pagesës shtesë për pensionistët, ashtu edhe te mënyra e sigurimit të mjeteve për financimin e saj.
Lampart, i cili do të largohet nga posti i kryeekonomistit të Federatës së Sindikatave të Zvicrës në fund të nëntorit, është konsideruar një nga figurat e rëndësishme në përpjekjet sindikale për realizimin e kësaj mase.
