Ruajtja e gjuhës shqipe dhe përcjellja e saj te brezat e rinj mbetet një mision i rëndësishëm për komunitetin shqiptar në Danimarkë, transmeton albinfo.ch.
Në kuadër të këtij angazhimi, Ambasada e Shqipërisë në Danimarkë, së bashku me Konsullatën e Kosovës, kanë zhvilluar një takim me nxënësit, mësuesit dhe prindërit në shkollën Ballerup Parkskolen, si dhe me klasën shqipe të Shoqatës Shtëpia e Kulturës Shqiptare.
Gjatë takimit janë dorëzuar tekste të reja për mësimin e gjuhës dhe kulturës shqiptare, me synimin për të mbështetur procesin mësimor dhe për të ndihmuar fëmijët shqiptarë në diasporë që të ruajnë lidhjen me gjuhën amtare dhe rrënjët e tyre kulturore.
Mirënjohje e veçantë u është shprehur mësuesve Mirditë Limani Ademi, Leonora Aliu dhe Sabri Ibishi, si dhe aktivistit Nevzat Kjamilji, për angazhimin dhe përkushtimin e tyre në ruajtjen dhe zhvillimin e mësimit të shqipes.
Mbështetja e prindërve u vlerësua gjithashtu si një pjesë thelbësore e këtij misioni, pasi bashkëpunimi mes familjes, mësuesve dhe institucioneve ndihmon në përcjelljen e gjuhës, kulturës dhe traditave shqiptare te brezat e rinj në mërgatë.
“Përmes rrënjëve lartësohemi” mbetet mesazhi që përcjell rëndësinë e ruajtjes së identitetit kombëtar dhe të gjuhës shqipe, kudo që jetojnë shqiptarët./Albinfo.ch.
