Dyshohet se vodhën mbi 10 mijë euro naftë në Gjermani, mes të dyshuarve edhe një kosovar

Policia gjermane ka nisur hetimet ndaj katër personave, të dyshuar për vjedhje të karburantit dizel nga një pikë karburanti me vetëshërbim në Prösen.

Katër persona, mes tyre një shtetas i Kosovës, janë nën hetim në Gjermani nën dyshimin për vjedhje të karburantit dizel në vlerë prej më shumë se 10 mijë eurosh nga një pikë karburanti me vetëshërbim në Prösen, pranë kufirit mes Brandenburgut dhe Saksonisë, transmeton albinfo.ch.

Sipas policisë, vjedhjet dyshohet se janë kryer gjatë disa ditëve. Të dyshuarit dyshohet se kanë manipuluar pajisjen e pikës së karburantit, duke marrë sasi të konsiderueshme nafte pa kryer pagesën.

Pas analizimit të pamjeve të kamerave të sigurisë, hetuesit kanë identifikuar automjetin që dyshohet se është përdorur në rastet e vjedhjes. Furgoni është gjetur më pas në Elsterwerda, ku policia ka hasur dy prej katër personave të dyshuar.

Gjatë kontrollit të automjetit janë gjetur edhe bidona të mbushur me karburant. Furgoni dhe karburanti i dyshuar si i vjedhur janë sekuestruar si pjesë e hetimeve.

Sipas policisë, të dyshuarit janë tre shtetas gjermanë dhe një shtetas i Kosovës. Ndaj tyre po zhvillohen hetime nën dyshimin për vjedhje të karburantit. Njëri prej personave dyshohet gjithashtu se ka drejtuar automjetin pa poseduar leje drejtimi.

Hetimet po vazhdojnë për të përcaktuar sasinë e plotë të karburantit të marrë, rolin e secilit prej të dyshuarve dhe nëse ata mund të lidhen me raste të tjera të ngjashme./Albinfo.ch

---