Von der Leyen anashkalon Serbinë dhe Bosnjën në turneun ballkanik: Do ta vizitojë Kosovën

Presidentja e Komisionit Evropian do të vizitojë Prishtinën, Tiranën, Podgoricën dhe Shkupin nga 30 shtatori deri më 2 tetor

Presidentja e Komisionit Evropian, Ursula von der Leyen, do ta vizitojë Kosovën në kuadër të turneut të saj të radhës në Ballkanin Perëndimor, ndërsa Serbia dhe Bosnjë-Hercegovina nuk janë pjesë e agjendës së kësaj vizite, transmeton albinfo.ch.

Sipas Komisionit Evropian, von der Leyen do të vizitojë Tiranën, Prishtinën, Podgoricën dhe Shkupin nga 30 shtatori deri më 2 tetor. Gjatë qëndrimit në këto vende, ajo pritet të takohet me presidentët dhe kryeministrat, si dhe të vizitojë projekte të financuara nga Bashkimi Evropian.

Zëdhënësja e Komisionit Evropian, Arianna Podesta, ka deklaruar se Serbia dhe Bosnjë-Hercegovina do të vizitohen në një periudhë të mëvonshme, duke marrë parasysh zgjedhjet e ardhshme parlamentare në Serbi dhe zgjedhjet e përgjithshme në Bosnjë-Hercegovinë.

Turneu i ardhshëm do të jetë vizita e gjashtë e von der Leyen në Ballkanin Perëndimor. Në fokus të takimeve pritet të jenë hapat e mëtejshëm të vendeve të rajonit drejt anëtarësimit në BE, procesi i integrimit gradual dhe mbështetja përmes Planit të Rritjes për Ballkanin Perëndimor.

Sipas Komisionit Evropian, vizita zhvillohet në kuadër të përpjekjeve për avancimin e procesit të zgjerimit të BE-së në Ballkanin Perëndimor. Von der Leyen ka deklaruar më herët se Bashkimi Evropian nuk do të jetë i plotë pa përfshirjen e Ballkanit Perëndimor.

Ndërkohë, mungesa e Serbisë dhe Bosnjë-Hercegovinës në këtë turne është komentuar edhe në kontekstin e zhvillimeve politike në rajon. Komisioni Evropian ka theksuar zgjedhjet e ardhshme si arsyen zyrtare për shtyrjen e vizitave në këto dy vende./Albinfo.ch

---