Policia: Përfundon pa incidente protesta e OVL-UÇK-së në Prishtinë

Policia e Kosovës tha se në protestën e së premtes morën pjesë mijëra qytetarë, ndërsa tubimi përfundoi rreth 40 minuta pas nisjes

Policia e Kosovës ka njoftuar se protesta e organizuar nga Organizata e Veteranëve të Luftës së UÇK-së, e mbajtur sot në sheshin “Skënderbeu” në Prishtinë, ka përfunduar e qetë dhe pa incidente, përcjell albinfo.ch. 

Sipas Policisë, protesta ka nisur në orën 12:00, ndërsa autoritetet kishin ndërmarrë masat e nevojshme të sigurisë para, gjatë dhe pas tubimit, me qëllim të ruajtjes së rendit dhe qetësisë publike.

“Policia e Kosovës, duke e njohur të drejtën e qytetarëve për shprehjen e lirë përmes tubimeve e protestave të qeta, sipas detyrës zyrtare është angazhuar që të ofrojë siguri për të gjithë qytetarët dhe vetë protestuesit, në mënyrë që mbarëvajtja e protestës të kalojë e qetë dhe pa incidente”, thuhet në njoftimin e Policisë.

Policia ka bërë të ditur se në tubim morën pjesë mijëra protestues, të cilët përmes disa fjalimeve shprehën pakënaqësitë e tyre lidhur me aktgjykimin e Dhomave të Specializuara të Kosovës në Hagë ndaj ish-krerëve të UÇK-së.

Sipas njoftimit, protesta përfundoi në orën 12:40, ndërsa pjesëmarrësit u shpërndanë në mënyrë të qetë.

“Njësitë policore kanë vazhduar me detyra sipas planifikimeve operacionale”, thuhet më tej në njoftim.

Policia e Kosovës ka falënderuar qytetarët për mirëkuptimin dhe bashkëpunimin, duke theksuar se zyrtarët policorë do të vazhdojnë të jenë të pranishëm në terren për garantimin e rendit dhe sigurisë publike./Albinfo.ch 

---