Kurti udhëton sot për në Amerikë, në agjendë Asambleja e OKB-së dhe takimi me shqiptarët

Kryeministri i Kosovës pritet të qëndrojë në Nju Jork në kuadër të javës së nivelit të lartë të Asamblesë së Përgjithshme të OKB-së

Kryeministri i Kosovës, Albin Kurti, udhëton sot drejt Shteteve të Bashkuara të Amerikës, ku pritet të marrë pjesë në aktivitetet që zhvillohen në kuadër të Asamblesë së Përgjithshme të Kombeve të Bashkuara, transmeton albinfo.ch.

Java e nivelit të lartë e sesionit të 81-të të Asamblesë së Përgjithshme të OKB-së zhvillohet në Nju Jork, ndërsa debati i përgjithshëm nis më 22 shtator.

Gjatë qëndrimit në SHBA, Kurti pritet të zhvillojë edhe një takim me pjesëtarë të komunitetit shqiptaro-amerikan në Nju Jork.

Sipas njoftimit të komunitetit shqiptaro-amerikan, takimi do të mbahet të shtunën, më 19 shtator, në Bronx, duke filluar nga ora 16:30.

Qëndrimi i Kurtit në Shtetet e Bashkuara përkon me aktivitetet e Asamblesë së Përgjithshme të OKB-së, ku gjatë kësaj periudhe në Nju Jork mblidhen përfaqësues të nivelit të lartë nga vende të ndryshme të botës./Albinfo.ch

---