Përfundon tuneli i parë në hekurudhën që synon të shkurtojë rrugën nga Kina drejt Evropës

Një hap i rëndësishëm është shënuar në ndërtimin e hekurudhës Kinë, Kirgistan, Uzbekistan, projekt që synon të krijojë një rrugë më të shkurtër tokësore për transportin e mallrave nga Kina drejt Lindjes së Mesme dhe Evropës.

Në Kirgistan ka përfunduar shpimi i tunelit Kosh Dobo North Nr. 2, me gjatësi rreth 210 metra. Ky është tuneli i parë i përfunduar në segmentin kirgistan të hekurudhës, që nga nisja e punimeve në shkallë të gjerë në qershor të vitit 2025, përcjell albinfo.ch.

Hekurudha do të shtrihet në më shumë se 500 kilometra dhe do të lidhë Kashgarin, në rajonin Xinjiang të Kinës, me Andijanin në Uzbekistan, duke kaluar përmes territorit malor të Kirgistanit. Rreth 305 kilometra të linjës do të kalojnë nëpër Kirgistan.

Aktualisht punimet po zhvillohen në 27 tunele, 43 ura dhe 88 segmente të trasesë, ndërsa ka nisur puna edhe për 20 stacione hekurudhore. Projekti po realizohet në kuadër të nismës kineze “Belt and Road”.

Kur të përfundojë, hekurudha pritet të krijojë një korridor të ri tokësor nga Kina drejt Lindjes së Mesme dhe Evropës. Sipas vlerësimeve të raportuara nga televizioni shtetëror kinez CCTV, rruga e re mund ta shkurtojë kohën e transportit deri në tetë ditë krahasuar me linjat kryesore aktuale hekurudhore Kinë, Evropë, të cilat kalojnë përmes Rusisë ose Kazakistanit.

Projekti ishte propozuar fillimisht në vitin 1997, por realizimi i tij ishte vonuar për vite për shkak të terrenit të vështirë, sfidave teknike, dallimeve në gjerësinë e shinave dhe çështjeve gjeopolitike. Për Kirgistanin dhe Uzbekistanin, të cilat nuk kanë dalje në det, hekurudha pritet të krijojë lidhje të reja tokësore me Kinën dhe tregjet ndërkombëtare.

 

---