Cassis: Zvicra dëshiron t’i rikthejë në rrugën e duhur bisedimet e paqes për Ukrainën

Pasi këshilltari zviceran i sigurisë, Gabriel Lüchinger, udhëtoi drejt Kievit dhe Moskës në muajin gusht për bisedime, Ministri i Jashtëm zviceran, Ignazio Cassis deklaroi se Zvicra dëshiron të “japë kontributin e saj për t’i rikthyer bisedimet e paqes në rrugën e duhur”.

Vetë Cassis kishte udhëtuar drejt Kievit dhe Moskës në shkurt, në cilësinë e tij si Kryesues në Detyrë i OSBE-së.

Më pas, ai tha se Zvicra i kishte mbështetur amerikanët në ndërmjetësimin midis Rusisë dhe Ukrainës në Gjenevë. Të dyja vendet ishin të lodhura nga lufta pas katër vite e gjysmë konflikti dhe po kërkonin mënyra për të ecur përpara, ndonëse me kushte të ndryshme, shtoi ai në një intervistë për gazetën “SonntagsBlick”.

Cassis nuk komentoi mbi ndonjë rezultat konkret të udhëtimit më të fundit të Lüchinger-it.

“Diplomacia kërkon durim. Rezultatet konkrete janë hapat e radhës, të cilët janë konfidencialë,” tha ministri i jashtëm. Zvicra po vazhdon të punojë drejt një përparimi diplomatik, tha ai, transmeton albinfo.ch.

Pas sugjerimit të Presidentit ukrainas Volodymyr Zelensky se Zvicra mund të ishte një vend i mundshëm për negociata me SHBA-në dhe Rusinë, Cassis tha se Berna shpreson që bisedimet të zhvillohen në Gjenevë. Megjithatë, ende nuk ka pasur një vendim qeveritar për një konferencë të mundshme paqeje në Zvicër, tha ai.

“Asgjë nuk është vendosur ende; ne vazhdojmë të punojmë me këmbëngulje prapa skenave – dhe gjithçka mund të ndryshojë,” tha Cassis.

Cassis tha gjithashtu se ka kërkuar një takim me homologun e tij rus, Sergei Lavrov, në kuadër të udhëtimit të tij të ardhshëm në Nju Jork. Për fundin e vitit është planifikuar edhe takimi i Këshillit Ministror të OSBE-së në Lugano.

“Ministrat e jashtëm të Rusisë dhe SHBA-së duhet të marrin pjesë. Kjo ofron mundësi për dialog dhe ndoshta edhe për më shumë,” tha Cassis.