Itali, vrau kosovarin për 30 mijë euro borxh dhe ia dogji trupin

E vrau për 30 mijë euro borxh dhe ia dogji trupin, drejtësia italiane rihap rastin

Gjykata e Kasacionit në Itali ka pranuar pjesërisht ankesën e Prokurorisë së Përgjithshme lidhur me dënimin ndaj mekanikut 56-vjeçar Cristiano Mossali, i dënuar për vrasjen e 40-vjeçarit nga Kosova, N.R., në vitin 2022, transmeton albinfo.ch.

Vendimi i Gjykatës së Apelit në Brescia, e cila e kishte ulur dënimin nga 27 në 14 vjet burg, është rrëzuar pjesërisht për sa i përket çështjes së paramendimit.

Për këtë arsye, rasti do të shqyrtohet sërish nga Gjykata e Apelit në Venecia. Gjykata e re do të duhet të përcaktojë nëse vrasja është kryer me paramendim dhe, në varësi të këtij vlerësimi, të rishqyrtojë edhe masën e dënimit.

N.R., 40 vjeç, banues në Capriolo të Italisë, ishte vrarë në vitin 2022. Trupi i tij ishte djegur dhe ishte fshehur në bagazhin e një automjeti SUV, ku më pas ishte gjetur më 29 gusht të atij viti.

Sipas akuzës, Mossali e kishte qëlluar 40-vjeçarin në punishten e tij pas një konflikti financiar. Në qendër të konfliktit ishte një borxh prej rreth 30 mijë eurosh, të cilin mekaniku nuk kishte arritur ta shlyente.

 

Në shkallën e parë, Mossali ishte dënuar me 27 vjet burg për vrasje me paramendim.

Më pas, Gjykata e Apelit në Brescia e kishte ulur dënimin në 14 vjet burg, pasi kishte përjashtuar paramendimin dhe kishte marrë parasysh rrethana lehtësuese.

Prokuroria e Përgjithshme e kishte kundërshtuar këtë vendim dhe kishte kërkuar ndërhyrjen e Gjykatës së Kasacionit.

Me vendimin e fundit, Gjykata e Kasacionit nuk e ka rrëzuar përgjegjësinë penale të Mossalit për vrasjen. Çështja që do të rishqyrtohet është kryesisht kualifikimi i veprës si vrasje me apo pa paramendim, si dhe dënimi përfundimtar.

Në gjykimin e parë në Apel, Prokuroria kishte kërkuar burgim të përjetshëm për Mossalin, ndërsa mbrojtja kishte kërkuar lirimin e tij nga akuzat. /Albinfo.ch

---