Ndryshimet klimatike po ndryshojnë reshjet në Zvicër

unsplash

Reshjet e shiut në Zvicër po bëhen më të rralla, por kur ndodhin janë gjithnjë e më intensive, një trend që pritet të vazhdojë edhe në të ardhmen, sipas MeteoSwiss.

Të dhënat tregojnë se rrebeshet dhjetëminutëshe janë bërë rreth 20 për qind më intensive që nga vitet 1980, ndërsa reshjet e mëdha ditore janë rritur në frekuencë me afërsisht 25 për qind gjatë shekullit të fundit.

Një nga arsyet kryesore është rritja e temperaturave. Për çdo 1°C ngrohje, ajri mund të mbajë rreth 7 për qind më shumë avull uji, duke krijuar kushte për stuhi dhe reshje më të fuqishme, transmeton albinfo.ch.

Në një skenar ku temperaturat rriten me 3°C, reshjet brenda një ore mund të shtohen deri në 30 për qind. Kjo do të rriste rrezikun nga përmbytjet e menjëhershme dhe rrëshqitjet e dheut, si dhe presionin mbi rrugët, urat dhe sistemet e kullimit, shumë prej të cilave janë ndërtuar sipas standardeve të vjetra klimatike.