Tre kosovarë arrestohen në Durrës për trafikim droge

Në operacionin "Anchor" u sekuestruan rreth 80 kilogramë kanabis, me vlerë të përllogaritur rreth një milion euro

Tre shtetas të Kosovës janë arrestuar në Durrës gjatë një operacioni të autoriteteve shqiptare kundër trafikimit ndërkombëtar të drogës.

Sipas Policisë së Shtetit, operacioni i koduar “Anchor” çoi në sekuestrimin e rreth 80 kilogramëve kanabis të llojit “Gelato”, përcjell albinfo.ch.

Vlera e drogës së sekuestruar përllogaritet në rreth një milion euro. Sipas hetimeve të deritanishme, lënda narkotike dyshohet se ishte transportuar nga Kanadaja dhe kishte si destinacion tregun në Shqipëri dhe Kosovë.

Gjatë operacionit janë sekuestruar gjithashtu prova të tjera materiale që pritet të përdoren në vazhdimin e hetimeve për zbardhjen e plotë të rrjetit të dyshuar të trafikimit.

Autoritetet shqiptare po vazhdojnë hetimet për të identifikuar persona të tjerë që mund të jenë të përfshirë në këtë veprimtari.

 

---