Në cilët kantone jetojnë më së shumti të moshuarit në Zvicër?

Popullsia e Zvicrës po plaket, por dallimet mes kantoneve janë të konsiderueshme. Të dhënat më të fundit të Zyrës Federale të Statistikave (BFS) tregojnë se Ticino ka përqindjen më të lartë të banorëve të moshës 65 vjeç e lart në vend.

Në fund të vitit 2025, në kantonin Ticino jetonin gjithsej 359’770 banorë. Prej tyre, 58’020 ishin të moshës 65 deri në 79 vjeç, ndërsa 29’472 ishin 80 vjeç e lart.

Kjo do të thotë se rreth 24.3 për qind e popullsisë së Ticinos është 65 vjeç ose më e vjetër – afërsisht një në çdo katër banorë.

Pas Ticinos renditet kantoni Graubünden. Nga 207’334 banorët e tij, 35’608 janë të moshës 65-79 vjeç dhe 14’117 janë mbi 80 vjeç. Në total, rreth 24 për qind e popullsisë së kantonit është 65+.

Edhe Nidwalden ka një përqindje të lartë të të moshuarve, me rreth 23.8 për qind, ndërsa në Basel-Landschaft kjo grupmoshë përbën rreth 23.5 për qind të popullsisë.

Në Jura, rreth 23.3 për qind e banorëve janë 65 vjeç e lart.

Pra, pesë kantonet me përqindjen më të lartë të banorëve 65+ janë:

Ticino – rreth 24.3%

Graubünden – rreth 24.0%

Nidwalden – rreth 23.8%

Basel-Landschaft – rreth 23.5%

Jura – rreth 23.3%

Ticino ka edhe raportin më të lartë të të moshuarve ndaj popullsisë në moshë pune

Dallimi bëhet edhe më i dukshëm kur të moshuarit krahasohen me popullsinë në moshë pune.

Sipas BFS-së, në Ticino ka 41.6 persona të moshës 65+ për çdo 100 banorë të moshës 20-64 vjeç. Ky është raporti më i lartë në Zvicër.

Pas Ticinos vijnë Jura me 41.1, Basel-Landschaft me 41.0, Graubünden me 40.8 dhe Nidwalden me 40.7 persona mbi 65 vjeç për çdo 100 persona në moshë pune.

Në anën tjetër, situata është dukshëm më ndryshe në kantonet urbane dhe ekonomikisht tërheqëse për fuqinë punëtore. Në Gjenevë ky raport është vetëm 26.8 persona 65+ për 100 banorë të moshës 20-64 vjeç. Në Vaud është 27.8 dhe në Zürich 28.1.

Zvicra po hyn në një fazë të re demografike

Në nivel kombëtar, në fund të vitit 2025 jetonin rreth 1.81 milion persona të moshës 65 vjeç e lart.

Për herë të parë, numri i tyre ka kaluar numrin e banorëve nën moshën 20-vjeçare.

Të dhënat tregojnë se plakja demografike nuk po zhvillohet me të njëjtin ritëm në të gjithë vendin. Kantonet si Ticino, Graubünden dhe Jura kanë një peshë dukshëm më të madhe të popullsisë së moshuar, ndërsa Zürich, Gjeneva dhe Vaud kanë një strukturë relativisht më të re.

Ky zhvillim pritet të ketë ndikim gjithnjë e më të madh në tregun e punës, sistemin e pensioneve, shëndetësi dhe nevojën për personel në sektorin e kujdesit.

Lexoni po ashtu:

Për herë të parë në Zvicër ka më shumë të moshuar se të rinj

---