Protestuesit kërkojnë pranim të 100 mijë refugjatëve sirianë

KEYSTONE

Solidarizimi me refugjatët dhe kundërshtimi i ksenofobisë ndaj tyre po vazhdon të nxjerrë në sheshe zviceranët. Kështu, të premten në Bazel janë tubuar rreth 700 veta të cilët kanë kërkuar pranimin shumë më masiv nga Zvicra të refugjatëve sirianë.

Demonstrimin e kanë organizuar socialistët e rinj, të Gjelbrit dhe organizatat që mbrojnë refugjatët si Amnesty International etj. Aty, përmes transparenteve të shpërndara është kërkuar nga Zvicra, veç tjerash, që të krijojë mundësi ligjore për sjelljen dhe strehimin e refugjatëve në vend. Ata kanë kërkuar që Zvicra të pranojë menjëherë 100 mijë refugjatë sirianë nga kampet në Liban dhe në Jordani, shkruan srf.ch.

Një ditë më parë, ministri zviceran i mbrojtjes Ueli Maurer kishte deklaruar se Zvicra ka kapacitet për pranimin e deri 50 mijë refugjatëve por vetëm si masë emergjente dhe afatshkurtër.

Policia bën të ditur se protesta ka rrjedhur në qetësi dhe pa incidente ndërsa, si pasojë e tubimit në qytet ka pasur pengesa vetëm në qarkullimin e tramvajëve.