Trump: Nuk ka bisedime me Iranin

Presidenti amerikan thotë se aktualisht nuk ka negociata të planifikuara me Teheranin

Presidenti amerikan Donald Trump ka deklaruar se aktualisht nuk po zhvillohen negociata me Iranin dhe se nuk ka bisedime të planifikuara mes dy vendeve.

Trump e bëri deklaratën më 18 gusht përmes platformës Truth Social, një ditë pasi kishte skaduar afati 60-ditor për arritjen e një marrëveshjeje përfundimtare të paqes, përcjell albinfo.ch.

Deklarata e tij vjen një ditë pasi Jared Kushner kishte thënë se kontaktet mes Uashingtonit dhe Teheranit po vazhdonin. Trump, megjithatë, ka mohuar se aktualisht po zhvillohen bisedime apo se janë planifikuar negociata të reja.

Presidenti amerikan foli edhe për situatën në Ngushticën e Hormuzit, duke thënë se ajo është e hapur dhe funksionale, ndërsa Teherani këmbëngul se kjo rrugë ujore strategjike mbetet e mbyllur derisa SHBA-ja të plotësojë disa kushte.

Irani ka kërkuar ndër të tjera heqjen e bllokadës detare dhe të sanksioneve ndaj naftës, zhbllokimin e aseteve të ngrira dhe përfundimin e operacioneve ushtarake amerikane.

Tensionet rreth Ngushticës së Hormuzit mbeten të larta, pasi kjo rrugë ujore ka rëndësi të madhe për furnizimet globale me naftë dhe vazhdon të jetë një nga pikat kryesore të përplasjes mes Uashingtonit dhe Teheranit.

---