Evropa vazhdon betejën me zjarret, mijëra hektarë të përfshirë nga flakët

Situata mbetet veçanërisht serioze në disa vende evropiane, ku autoritetet kanë mobilizuar qindra zjarrfikës, avionë dhe helikopterë për shuarjen e zjarreve

Zjarret pyjore vazhdojnë të përfshijnë pjesë të ndryshme të Evropës, ndërsa temperaturat e larta, thatësira dhe vegjetacioni i tharë po vështirësojnë përpjekjet e zjarrfikësve për vënien e flakëve nën kontroll.

Situata mbetet veçanërisht serioze në disa vende evropiane, ku autoritetet kanë mobilizuar qindra zjarrfikës, avionë dhe helikopterë për shuarjen e zjarreve, transmeton albinfo.ch.

Në Belgjikë, zjarri në rezervatin natyror High Fens është bërë më i madhi i regjistruar ndonjëherë në vend. Rreth 3,000 hektarë janë përfshirë nga flakët, ndërsa afro 600 banorë dhe vizitorë janë evakuuar. Zjarri është afruar edhe pranë kufirit me Gjermaninë, duke nxitur mobilizimin e forcave dhe mjeteve ajrore nga disa vende evropiane.

Situatë e rëndë është regjistruar edhe në Greqi. Dy persona humbën jetën nga një zjarr që përfshiu ishullin Salamina, pranë Athinës. Mbi 500 persona u evakuuan, ndërsa rreth 192 zjarrfikës, të mbështetur nga avionë, helikopterë dhe mjete të tjera, u angazhuan në operacion.

Zjarret kanë prekur gjatë kësaj vere edhe Francën, Spanjën, Kroacinë, Gjermaninë dhe vende të tjera evropiane, duke detyruar autoritetet të ndërmarrin evakuime dhe të kërkojnë ndihmë ndërkombëtare.

Kushtet ekstreme meteorologjike po konsiderohen një faktor kryesor në përhapjen e shpejtë të zjarreve. Temperaturat e larta, thatësira e zgjatur dhe vegjetacioni shumë i thatë kanë krijuar kushte të favorshme që flakët të përhapen me shpejtësi.

Ndërkohë, vendet evropiane po bashkëpunojnë përmes mekanizmave të mbrojtjes civile të Bashkimit Evropian, duke dërguar avionë, helikopterë dhe ekipe zjarrfikëse në zonat më të rrezikuara.

---