100 kadetë diplomojnë nga Trajnimi Profesional për Zyrtarë Korrektues

Shërbimi Korrektues i Kosovës organizon sot ceremoninë solemne të diplomimit të gjeneratës së 46-të, në Akademinë e Kosovës për Siguri Publike në Vushtrri.

Shërbimi Korrektues i Kosovës (ShKK) sot organizon ceremoninë solemne të diplomimit të gjeneratës së 46-të të Trajnimit Profesional për Zyrtarë Korrektues, përcjell albinfo.ch.

Në këtë gjeneratë do të diplomojnë gjithsej 100 kadetë, të cilët kanë përfunduar programin profesional të trajnimit për ushtrimin e detyrës së zyrtarit korrektues.

Ceremonia do të mbahet në ambientet e Akademisë së Kosovës për Siguri Publike (AKSP) në Vushtrri, duke filluar nga ora 10:00.

Në ceremoninë solemne pritet të marrin pjesë përfaqësues të institucioneve të larta të Republikës së Kosovës.

Në mesin e pjesëmarrësve do të jenë kryeministri në detyrë i Kosovës, Albin Kurti, zëvendëskryeministrja dhe ministrja në detyrë e Drejtësisë, Donika Gërvalla, drejtori i Përgjithshëm i Shërbimit Korrektues të Kosovës, Ismail Dibrani, si dhe ushtruesi i detyrës së drejtorit të Përgjithshëm të Akademisë së Kosovës për Siguri Publike, Shpend Shabani.

Diplomimi i 100 kadetëve shënon përfundimin e një tjetër cikli të përgatitjes profesionale për zyrtarët e rinj korrektues, të cilët pritet të angazhohen në sistemin korrektues të Republikës së Kosovës./Albinfo.ch

---