Britani: Farage propozon burgjet e Kosovës për të dënuarit e huaj

Nigel Farage përmend Kosovën si mundësi për burgosjen e të huajve nga Britania

Lideri i Reform UK, Nigel Farage, ka propozuar që të burgosurit e huaj në Britani të dërgohen jashtë vendit për të vuajtur dënimet, me synimin për të liruar hapësira në burgjet britanike dhe për t’i dhënë fund skemës së lirimit të parakohshëm, përcjell albinfo.ch.

Farage ka thënë se partia e tij po shqyrton mundësinë e marrjes me qira të hapësirave në burgje në vende të treta. Në mesin e shteteve të përmendura si mundësi është edhe Kosova, ndërsa si alternativa janë përmendur El Salvadori, Estonia dhe Lituania.

Sipas planit të Reform UK, shtetasit e huaj që dënohen me masa që nuk përfshijnë burgimin do të deportoheshin në vendet e tyre të origjinës. Ndërsa ata që dënohen me burg do ta vuanin të gjithë dënimin në vendin e tyre ose në një shtet të tretë që do t’i ofronte Britanisë hapësira burgimi me qira.

Farage përmend marrëveshjen Kosovë-Danimarkë

Farage e ka përmendur Kosovën si një model të mundshëm, duke iu referuar marrëveshjes së arritur më parë mes Kosovës dhe Danimarkës.

Në vitin 2021, Danimarka ra dakord t’i paguante Kosovës rreth 12.8 milionë paundë në vit për një periudhë fillestare pesëvjeçare, në këmbim të marrjes me qira të 300 vendeve në burgjet e Kosovës për të burgosur të huaj që vuajnë dënime në Danimarkë.

Sipas Farage, marrëveshje të ngjashme me vende të tjera do t’i mundësonin Britanisë të lironte mijëra vende në burgjet e saj.

Reform UK thotë se marrëveshje të tilla do të duhej të garantonin standardet britanike për kushtet e burgimit, përfshirë madhësinë e qelive, ndriçimin, ngrohjen, ventilimin dhe kohën e kaluar në ambient të hapur.

Mbi 10 mijë të huaj në burgjet e Anglisë dhe Uellsit

Në fund të qershorit, në burgjet e Anglisë dhe Uellsit ndodheshin 10.134 shtetas të huaj, që përbënin rreth 12 për qind të numrit të përgjithshëm të të burgosurve.

Reform UK pretendon se transferimi i tyre jashtë Britanisë do të lironte më shumë se 10 mijë vende në burgjet britanike.

Partia ka propozuar gjithashtu ndërtimin e 12.400 vendeve të reja në burgje të përkohshme, të njohura si “Nightingale prisons”, me një kosto të parashikuar prej rreth 5 miliardë paundësh.

Qeveria britanike e ka kundërshtuar propozimin, duke e cilësuar atë jo si një plan serioz për sistemin e burgjeve. Ajo ka argumentuar se marrëveshjet për marrjen me qira të burgjeve jashtë vendit do të kërkonin vite për t’u realizuar. /Albinfo.ch

---