Bebe Rexha arrin një tjetër sukses, “New Religion” kalon 100 milionë dëgjime në Spotify

Bebe Rexha arrin 100 milionë dëgjime në Spotify me “New Religion”

Artistja shqiptare me famë botërore, Bebe Rexha, ka shënuar një tjetër arritje në karrierën e saj muzikore. Kënga “New Religion” ka tejkaluar shifrën e 100 milionë dëgjimeve në Spotify, platformën më të madhe të transmetimit të muzikës në botë, përcjell albinfo.ch.

Lajmin e ka ndarë vetë këngëtarja përmes një postimi në InstaStory, ku ka shprehur entuziazmin për suksesin e këngës dhe pritjen pozitive që ka marrë albumi i saj më i fundit, “Dirty Blonde”.

“New Religion”, e publikuar si kënga kryesore e albumit, është një ripërpunim modern i hitit legjendar “Insomnia” të grupit Faithless, duke ndërthurur elemente të muzikës elektronike klasike me stilin pop dhe dance që e ka bërë Bebe Rexhën të njohur në skenën ndërkombëtare.

Kënga është pritur shumë mirë nga publiku dhe ka vazhduar të rritet në mënyrë të qëndrueshme në platformat digjitale, derisa tashmë ka kaluar pragun e rëndësishëm të 100 milionë stream-eve në Spotify.

Albumi “Dirty Blonde”, i publikuar në muajin qershor, është projekti i katërt studio në karrierën e Bebe Rexhës, por ka një rëndësi të veçantë për artisten, pasi është albumi i saj i parë i realizuar si artiste e pavarur.

Vitin e kaluar, Bebe i dha fund bashkëpunimit me ish-shtëpinë e saj diskografike Warner Records, duke zgjedhur të hapë një kapitull të ri në karrierën e saj me më shumë liri krijuese dhe kontroll të plotë mbi muzikën që publikon.

Suksesi i “New Religion” shihet si një tregues i qartë se ky vendim ka nisur të japë rezultatet e para. Ndërkohë, “Dirty Blonde” po vazhdon të tërheqë vëmendje të madhe si nga publiku, ashtu edhe nga kritika, duke e konfirmuar edhe një herë Bebe Rexhën si një nga artistet shqiptare më të suksesshme në skenën ndërkombëtare. /Albinfo.ch

---