Grupi italian “Cosimo and the Hot Coals” elektrizon Prishtinën me një koncert të veçantë

Performanca u mbajt në kuadër të aktiviteteve të Rame Lahaj Foundation, me mbështetjen e Ambasadës së Italisë në Kosovë.

Grupi italian “Cosimo and the Hot Coals” solli një atmosferë të veçantë në Prishtinë me një koncert të mbajtur në kuadër të aktiviteteve të Rame Lahaj Foundation, duke bashkuar publikun përmes muzikës dhe shkëmbimit kulturor, përcjell albinfo.ch.

Mbrëmja u karakterizua nga performanca energjike e grupit italian, e cila u mirëprit nga publiku në kryeqytet, duke sjellë tingujt e muzikës italiane në zemër të Prishtinës.

Përmes një reagimi, Ambasada e Italisë në Kosovë shprehu kënaqësinë për mbështetjen e këtij aktiviteti, duke e cilësuar koncertin si një mbrëmje të paharrueshme ku muzika, energjia dhe shkëmbimi kulturor u ndërthurën në mënyrë të veçantë.

Ambasada falënderoi gjithashtu Rame Lahaj Foundation për organizimin e ngjarjes dhe për promovimin e kulturës italiane përmes muzikës në Kosovë.

Koncerti u vlerësua si një tjetër shembull i bashkëpunimit kulturor mes Italisë dhe Kosovës, duke dëshmuar se muzika mbetet një urë e rëndësishme që afron njerëzit dhe kulturat./Albinfo.ch

---