Kolona deri në 18 kilometra në tunelin e Gotthardit, pritjet arrijnë në tre orë

Fluksi i madh i pushuesve ka shkaktuar bllokime të gjata në hyrjen veriore të tunelit, ndërsa TCS u rekomandon shoferëve të përdorin rrugë alternative.

Drejtuesit e automjeteve që po udhëtojnë drejt jugut të Zvicrës po përballen me kolona të gjata në hyrjen veriore të tunelit të Gotthardit, përcjell albinfo.ch.

Sipas të dhënave të fundit, kolona para Göschenenit ka arritur në rreth 18 kilometra, ndërsa pritjet për të kaluar tunelin zgjasin deri në tre orë.

Për shkak të fluksit të madh të trafikut, organizata zvicerane e automjeteve TCS u rekomandon udhëtarëve që, nëse është e mundur, të përdorin rrugë alternative. Ndër opsionet e sugjeruara janë kalimi përmes qafës së Simplonit, transporti i automjeteve përmes qafës së Lötschbergut ose rruga përmes qafës së Shën Bernardit të Madh.

Autoritetet u bëjnë thirrje drejtuesve të automjeteve të planifikojnë udhëtimin me kohë dhe të llogarisin vonesa të konsiderueshme gjatë ditëve në vijim. /Albinfo.ch

---