Cilat shtete evropiane lejojnë vdekjen e asistuar? Franca i bashkohet listës

Zvicra ka një qasje të veçantë. Ajo nuk lejon eutanazinë aktive, por vetëvrasja e asistuar është e ligjshme nëse nuk kryhet për motive egoiste

Pas miratimit të ligjit në Parlamentin francez, Franca bëhet një nga vendet evropiane që u japin pacientëve me sëmundje të pashërueshme të drejtën për t’i dhënë fund jetës në kushte të përcaktuara me ligj.

Franca ka bërë një hap historik në politikën e saj shëndetësore dhe sociale, pasi Asambleja Kombëtare miratoi ligjin për vdekjen e asistuar. Legjislacioni i ri u jep të drejtën të rriturve me sëmundje të pashërueshme dhe vuajtje të padurueshme të kërkojnë ndihmë mjekësore për t’i dhënë fund jetës, duke respektuar një sërë kriteresh dhe procedurash të rrepta.

Ligji pritet t’i nënshtrohet shqyrtimit kushtetues përpara se të hyjë në fuqi, shkruan The Local, transmeton albinfo.ch.

Me këtë vendim, Franca i bashkohet një grupi gjithnjë e më të madh shtetesh evropiane që lejojnë një formë të vdekjes së asistuar. Holanda ishte vendi i parë në botë që legalizoi eutanazinë dhe vetëvrasjen e asistuar në vitin 2002, e ndjekur po atë vit nga Belgjika. Më vonë, Luksemburgu, Spanja, Austria dhe Portugalia miratuan legjislacion të ngjashëm, megjithëse në Portugali zbatimi ende pret përfundimin e procedurave ligjore.

Zvicra ka një qasje të veçantë. Ajo nuk lejon eutanazinë aktive, por vetëvrasja e asistuar është e ligjshme nëse nuk kryhet për motive egoiste.

Për këtë arsye, organizata si Dignitas dhe Exit kanë tërhequr ndër vite persona nga vende të ndryshme që kërkojnë këtë procedurë në përputhje me ligjin zviceran.

Çështja e vdekjes së asistuar mbetet një nga debatet më të ndjeshme etike dhe shoqërore në Evropë. Mbështetësit argumentojnë se ajo garanton dinjitet dhe autonomi për pacientët që përballen me vuajtje të pashpresa, ndërsa kundërshtarët shprehin shqetësime për mbrojtjen e personave më të cenueshëm dhe pasojat etike të një vendimi të tillë.

---