Kosova siguron mbi 206 milionë euro nga fondet e Bashkimit Evropian

Fondet e IPA-s do të financojnë projekte infrastrukturore dhe zhvillimin e sektorëve strategjikë në vend

Kryeministri në detyrë i Kosovës, Albin Kurti, ka njoftuar se Kosova ka siguruar 206.4 milionë eurombështetje financiare nga Bashkimi Evropian përmes programeve të Instrumentit të Asistencës së Para-Anëtarësimit (IPA), përcjell albinfo.ch.

Sipas Kurtit, Bashkimi Evropian ka konfirmuar zyrtarisht se Komiteti i IPA-s ka miratuar projektet e propozuara nga Kosova në kuadër të programeve IPA 2026 dhe IPA 2027, me një vlerë prej 180.5 milionë euro.

Ai bëri të ditur se një pjesë e konsiderueshme e fondeve do të dedikohet për investime në infrastrukturë, ndërsa projektet do të realizohen në bashkëpunim me partnerët zhvillimorë dhe me bashkëfinancim nga institucionet e Kosovës.

“Rreth gjysma e fondeve do të shkojnë për investime infrastrukturore. Shumica e projekteve do të realizohen në bashkëpunim me partnerë zhvillimorë dhe me bashkëfinancim nga institucionet tona”, ka shkruar Kurti.

Sipas tij, mbështetja financiare nga Bashkimi Evropian do të kontribuojë në zhvillimin e sektorëve strategjikë dhe në zbatimin e projekteve që synojnë përmirësimin e infrastrukturës, rritjen e kapaciteteve institucionale dhe avancimin e proceseve zhvillimore në Kosovë.

Kurti e cilësoi këtë si një mbështetje të rëndësishme për zhvillimin ekonomik dhe institucional të vendit, duke theksuar se fondet do të shfrytëzohen për projekte me ndikim afatgjatë në interes të qytetarëve./Albinfo.ch

---