FIFA alarmon për rritjen e komenteve raciste gjatë Botërorit, në shënjestër edhe futbollistët e Zvicrës

Federata Zvicerane e Futbollit ka ashpërsuar masat kundër gjuhës së urrejtjes, ndërsa rastet me elemente penale po i referohen policisë

Federata Ndërkombëtare e Futbollit (FIFA) ka konstatuar një rritje shqetësuese të komenteve raciste dhe gjuhës së urrejtjes në rrjetet sociale gjatë Kupës së Botës 2026, krahasuar me Botërorin e vitit 2022 në Katar, raportojnë mediat zvicerane, përcjell albinfo.ch.

Sipas transmetuesit publik zviceran SRF, ky fenomen po shndërrohet në një problem serioz dhe po prek edhe futbollistët e Kombëtares së Zvicrës, të cilët shpesh bëhen objekt i sulmeve për shkak të ngjyrës së lëkurës ose prejardhjes së tyre, veçanërisht pas rezultateve zhgënjyese.

Vala e komenteve fyese u intensifikua pas ndeshjes së parë të Zvicrës në këtë Botëror, e cila përfundoi me rezultat 1:1 ndaj Katarit. Pas barazimit, profile të shumta në rrjetet sociale publikuan komente me përmbajtje raciste ndaj futbollistëve zviceranë, ndërsa në mesin e lojtarëve të shënjestruar ishte edhe sulmuesi i ri, Johan Manzambi.

Përballë kësaj situate, Federata Zvicerane e Futbollit (SFV) ka ndërmarrë masa shtesë për mbrojtjen e lojtarëve.

Zëdhënësi i federatës, Adrian Arnold, bëri të ditur se SFV zbaton një politikë të tolerancës zero ndaj gjuhës së urrejtjes. Sipas tij, menaxherët e rrjeteve sociale të federatës mbyllin ose kufizojnë komentet në platformat zyrtare sapo konstatohet një valë sulmesh.

Arnold theksoi se federata nuk kufizohet vetëm në fshirjen e komenteve apo bllokimin e profileve, por çdo rast që përmban elemente të mundshme të veprës penale të racizmit i përcillet policisë përmes departamentit juridik, me qëllim ndjekjen ligjore të autorëve.

Megjithatë, sipas zyrtarëve zviceranë, lufta kundër gjuhës së urrejtjes mbetet sfiduese për aq kohë sa platformat e mëdha të rrjeteve sociale vazhdojnë të lejojnë krijimin e profileve anonime pa mekanizma më të fortë identifikimi.

Për këtë arsye, Federata Zvicerane e Futbollit u ka bërë sërish thirrje kompanive të teknologjisë që të marrin më shumë përgjegjësi në luftimin e racizmit dhe gjuhës së urrejtjes në internet, duke theksuar se ky fenomen po dëmton jo vetëm futbollistët, por edhe imazhin e sportit më të ndjekur në botë./Albinfo.ch

---