Xhaka tregon pse shpërtheu në lot pasi e udhëhoqi Zvicrën drejt historisë

Granit Xhaka pas kualifikimit historik: Tani kemi një qëllim të ri – ta eliminojmë Argjentinën

Kapiteni i Zvicrës, Granit Xhaka, nuk i fshehu emocionet pas kualifikimit historik në çerekfinalen e Kupës së Botës 2026. Menjëherë pasi Ruben Vargas realizoi penalltinë vendimtare ndaj Kolumbisë, mesfushori zviceran u rrëzua në fushë dhe shpërtheu në lot, duke përjetuar një nga momentet më të rëndësishme të karrierës së tij, transmeton albinfo.ch.

“Për mua ishte një lehtësim i pastër. Njerëzit që më njohin e dinë se gjithmonë i bëj shumë presion vetes. Vetëm doja ta shijoja atë moment. Nuk e kupton menjëherë se çfarë ka ndodhur. Ishte e pabesueshme dhe diçka për të cilën ne si lojtarë, stafi, familjet tona dhe i gjithë vendi mund të jemi krenarë”, deklaroi Xhaka pas ndeshjes.

Megjithatë, kapiteni theksoi se Zvicra nuk e konsideron të përfunduar misionin në këtë Botëror.

“Qëllimi ynë i parë ishte të kualifikoheshim në Kupën e Botës. I dyti ishte kalimi i fazës së grupeve, i treti avancimi në fazën tjetër. Tani kemi arritur edhe objektivin e katërt dhe kemi bërë histori. Por tashmë kemi një qëllim të pestë”, u shpreh ai.

Në çerekfinale, Zvicra do të përballet me kampionen në fuqi të botës, Argjentinën, një sfidë që zgjon kujtime të hidhura për Xhakën. Dy kombëtaret u përballën edhe në Botërorin e vitit 2014, kur Argjentina fitoi 1:0 vetëm pas vazhdimeve, falë golit të Angel Di Maria në minutën e 118-të.

“Viti 2014 na lëndoi. Ishim shumë pranë që t’i eliminonim argjentinasit”, kujtoi mesfushori, i cili së bashku me Ricardo Rodriguez janë të vetmit lojtarë të skuadrës aktuale që ishin pjesë e atij takimi.

Xhaka foli me respekt edhe për Lionel Messin, rivalin e tij të radhës.

“Është një privilegj të luash në epokën e Lionel Messit dhe Cristiano Ronaldos. Ata janë dy nga futbollistët më të mëdhenj në histori”, tha kapiteni zviceran.

Pas ndeshjes, përzgjedhësi Murat Yakin vlerësoi edhe një herë rolin e Xhakës në suksesin e ekipit.

“Ai e motivon vazhdimisht skuadrën me fjalët e tij. Është një kapiten i vërtetë, ka luftuar dhe ka vuajtur së bashku me ekipin. Nuk e dimë nëse ky do të jetë Botërori i tij i fundit, por ai po jep gjithçka për Zvicrën”, deklaroi Yakin./Albinfo,ch

---