Diaspora Meeting rikthehet me edicionin e nëntë në Kosovë

Adhuruesit e automobilizmit dhe drifting-ut do të mblidhen më 26 korrik në Terminalin Doganor Devolli, ku pritet një spektakël me mysafirë specialë, muzikë dhe aktivitete argëtuese

Pas tetë edicionesh të suksesshme, Diaspora Meeting rikthehet edhe këtë verë me edicionin e nëntë, duke premtuar një ditë të mbushur me adrenalinë për të gjithë pasionantët e automobilizmit.

Ngjarja do të mbahet më 26 korrik, duke filluar nga ora 17:00, pranë Klan Arenës.

Përveç demonstrimeve të drifting-ut, vizitorët do të kenë mundësi të shijojnë muzikë, ushqim dhe pije, ndërsa organizatorët premtojnë një atmosferë festive gjatë gjithë mbrëmjes.

Një nga pikat kulmore të aktivitetit do të jetë pjesëmarrja e Red Bull Driftbrothers, të cilët do të jenë mysafirët specialë të këtij edicioni dhe pritet të dhurojnë një shfaqje spektakolare për publikun.

Diaspora Meeting është shndërruar ndër vite në një nga aktivitetet më të njohura verore për komunitetin e automobilizmit, duke mbledhur pjesëmarrës dhe vizitorë nga Kosova, diaspora dhe vendet e rajonit. Organizatorët presin që edhe edicioni i sivjetmë të tërheqë një numër të madh të apasionuarve pas makinave dhe sporteve motorike.

---