Rama: Zvërneci është tokë private, projektet do të jenë në përputhje me standardet e BE-së

By Flladina Zilja -

Kryeministri i Shqipërisë Edi Rama ka folur për  debatet rreth investimeve në Sazan dhe Zvërnec. Ai tha se pretendimet për shitjen e tokës publike nuk qëndrojnë. Sipas tij, Zvërneci është tokë private, ndërsa Sazani mbetet pronë shtetërore dhe nuk është shitur.

Rama sqaroi se marrëveshja për Sazanin është ende në fazë negociatash dhe se shteti shqiptar do të vazhdojë të jetë pronar i tokës dhe partner në projekt.

Kryeministri theksoi gjithashtu se çdo zhvillim do të realizohet në përputhje të plotë me standardet e Bashkimit Europian, përfshirë vlerësimin e ndikimit në mjedis dhe respektimin e rregullave për zonat e mbrojtura.

Sipas tij, Komisioni Europian është i informuar për procesin dhe deri tani nuk ka ngritur shqetësime, pasi zhvillimet po ndjekin kornizën ligjore dhe standardet evropiane.