Pse lodhemi nga vapa

Në disa zona, një temperaturë reale prej 35 gradë Celsius mund të perceptohet sikur të jetë rreth 41 gradë, si pasojë e kombinimit të vapës, lagështisë së shtuar dhe netëve të përshkruara si tropikale, kur temperaturat nuk bien mjaftueshëm për të freskuar ajrin

Muaji qershor ka sjellë temperatura rekord, ditë përvëluese dhe netë të vështira për shumë njerëz. Meteorologët paralajmërojnë se kjo valë e të nxehtit mund të ndihet edhe më e ashpër nga sa tregon zhiva e termometrit, e kjo për shkak të lagështisë në ajër, mungesës së freskimit gjatë natës dhe temperaturave të larta që zgjasin për disa ditë me radhë.

Në disa zona, një temperaturë reale prej 35 gradë Celsius mund të perceptohet sikur të jetë rreth 41 gradë, si pasojë e kombinimit të vapës, lagështisë së shtuar dhe netëve të përshkruara si tropikale, kur temperaturat nuk bien mjaftueshëm për të freskuar ajrin.

Sipas ekspertëve, shkaku kryesor i kësaj situate është fenomeni i njohur si “kupola e nxehtësisë”, një zonë e gjerë me presion të lartë atmosferik që ka bllokuar masat e ajrit të nxehtë mbi rajon.

Ky fenomen pengon qarkullimin normal të ajrit, duke bërë që ai të zbresë drejt sipërfaqes së tokës dhe të ngrohet edhe më shumë, thotë BBC, shkruan TCH, transmeton albinfo.ch.

Lagështia e lartë mbetet një nga faktorët kryesorë që e bën këtë valë të të nxehtit më të vështirë për organizmin. Kur ajri përmban shumë lagështi, djersa nuk avullon lehtë nga lëkura, duke penguar procesin natyror të ftohjes së trupit. Si rezultat, një temperaturë reale prej 35 gradë Celsius mund të ndihet sikur të jetë mbi 40 gradë, duke rritur lodhjen dhe rrezikun për probleme shëndetësore gjatë ekspozimit të zgjatur ndaj vapës.

Ekspertët paralajmërojnë gjithashtu se disa netë tropikale radhazi mund të rrisin rrezikun për probleme shëndetësore, përfshirë lodhjen nga nxehtësia, stresin mbi sistemin kardiovaskular dhe çrregullimet e gjumit, pasi organizmi nuk arrin të rikuperohet plotësisht gjatë natës.

 

---