Marigona dhe Irena Toma sjellin ekspozitën e tyre në Frankfurt më 26 qershor

Marigona dhe Irena Toma prezantojnë ekspozitën "AugenBlicke und Emotionen in Farbe", një ndërthurje e traditës shqiptare me artin bashkëkohor

Artistet shqiptare, Marigona dhe Irena Toma, do të prezantojnë krijimtarinë e tyre në ekspozitën e përbashkët “AugenBlicke und Emotionen in Farbe” (Shikime dhe Emocione në Ngjyra), e cila do të hapet më 26 qershor në Frankfurt të Gjermanisë, shkruan albinfo.ch.

Ekspozita sjell para publikut një dialog artistik mes traditës dhe bashkëkohores, ku përmes ngjyrës, emocionit dhe formave të ndryshme të shprehjes artistike pasqyrohen identiteti, kujtesa dhe përjetimet njerëzore.

Të frymëzuara nga kultura shqiptare, artistet synojnë të prezantojnë vepra që ndërthurin rrënjët kulturore me qasje moderne, duke e sjellë trashëgiminë shqiptare në një kontekst bashkëkohor.

Ekspozita do të qëndrojë e hapur nga 26 qershori deri më 11 shtator 2026, ndërsa vernisazhi do të mbahet më 26 qershor, nga ora 14:00 deri në 17:00, në ambientet e Landgericht Frankfurt am Main, në restorantin e institucionit (Ndërtesa E, kati përdhes), në adresën Gerichtsstraße 2, 60313 Frankfurt am Main.

Organizatorët kanë ftuar artdashësit dhe publikun e gjerë të bëhen pjesë e këtij udhëtimi artistik, i cili synon të ndërtojë ura mes kulturave përmes artit. /Albinfo.ch

---