Zlatan Ibrahimovic kritikon Granit Xhakën: Duhej t’ia linte penalltinë talentit të ri për hat-trick

“Mos më fol për lidership” – Ibrahimovic kritika të ashpra ndaj Granit Xhakës pas ndeshjes me Bosnjën

Legjenda suedeze vlerësoi talentin e ri Manzambi, duke thënë se kapiteni i Zvicrës duhej t’ia linte penalltinë për të kompletuar hat-trickun ndaj Bosnjë-Hercegovinës, transmeton albinfo.ch.

Ish-sulmuesi i njohur suedez, Zlatan Ibrahimovic, ka kritikuar kapitenin e Zvicrës, Granit Xhakën, për vendimin e tij që të ekzekutonte vetë penalltinë në ndeshjen ndaj Bosnjë-Hercegovinës, në vend që t’ia linte talentit të ri Manzambi, i cili ishte vetëm një gol larg realizimit të hat-trickut.

Në një deklaratë që ka ngjallur debat në opinionin sportiv, Ibrahimovic tha se veprime të tilla tregojnë më shumë për një lider sesa vetë shiriti i kapitenit.

“Nuk i kuptoj disa futbollistë. Flasin çdo ditë për familjen, shpirtin e ekipit dhe lidershipin, por kur një djalosh është një gol larg hat-trickut, papritur të gjitha këto harrohen sapo akordohet një penallti”, u shpreh Ibrahimovic.

Ai theksoi se Xhaka është një futbollist me përvojë të madhe dhe një figurë e rëndësishme e kombëtares zvicerane, por pikërisht për këtë arsye mendon se duhej të kishte vepruar ndryshe.

“Xhaka është një emër i madh dhe një kapiten me përvojë, por pikërisht për këtë arsye duhej t’ia jepte topin Manzambit. Askush nuk e mban mend një veteran që shënon një tjetër penallti. Njerëzit mbajnë mend një talent të ri që prezantohet para botës me një hat-trick”, deklaroi ai.

Ibrahimovic shkoi edhe më tej, duke thënë se lidershipi i vërtetë matet me veprime konkrete dhe jo me fjalë.

“Për mua është e thjeshtë: nëse je tashmë i konfirmuar dhe ia mohon një lojtari të ri mundësinë për një hat-trick, atëherë mos më fol për lidership. Më trego veprimet, jo shiritin e kapitenit”, përfundoi legjenda suedeze.

Deklaratat e Ibrahimovicit pritet të nxisin diskutime të shumta mes tifozëve dhe analistëve, ndërsa vetë Xhaka ende nuk ka reaguar publikisht ndaj këtyre komenteve./Albinfo.ch

---