Granit Xhaka hyn në historinë e kombëtares së Zvicrës me rekord të ri në Kupën e Botës

Kapiteni zviceran barazon rekordin e paraqitjeve në Botëror dhe vazhdon të shkruajë historinë me fanellën helvete

Kapiteni i kombëtares së Zvicrës, Granit Xhaka, ka hyrë në historinë e futbollit zviceran duke regjistruar një rekord të ri në fazat finale të Kupës së Botës, transmeton albinfo.ch.

Në ndeshjen ndaj Katarit në Botërorin 2026, mesfushori me prejardhje nga Kosova zhvilloi paraqitjen e tij të 13-të në një Kampionat Botëror, duke u bërë lojtari me më së shumti ndeshje në këtë kompeticion për kombëtaren zvicerane.

Me këtë paraqitje, Xhaka ka barazuar rekordin që aktualisht e mban së bashku me mbrojtësin Ricardo Rodriguez. Më herët, këtë arritje e kishte edhe Xherdan Shaqiri, i cili numëronte 13 paraqitje në Kupat e Botës para se t’i jepte fund karrierës me përfaqësuesen zvicerane në korrik të vitit 2024.

Botërori i vitit 2026 shënon gjithashtu pjesëmarrjen e katërt radhazi të Granit Xhakës në turneun më prestigjioz të futbollit botëror. Ai ishte pjesë e Zvicrës në Kupën e Botës në Brazil më 2014, në Rusi më 2018, në Katar më 2022 dhe tani në edicionin e vitit 2026.

Përveç rolit të tij si kapiten, Xhaka vazhdon të mbetet një nga figurat më të rëndësishme të kombëtares zvicerane, duke lënë gjurmë të pashlyeshme në historinë e futbollit të këtij vendi dhe duke qenë një prej sportistëve më të suksesshëm me origjinë shqiptare në arenën ndërkombëtare./Albinfo.ch

---