Yakin vendos rregulla të ashpra në kampin e Zvicrës para Botërorit

Trajneri i Kombëtares zvicerane ka përcaktuar kufij të qartë për lojtarët, vizitat familjare dhe disiplinën gjatë Kampionatit Botëror 2026

Përzgjedhësi i Zvicrës, Murat Yakin, ka zbuluar rregullat që do të vlejnë për futbollistët e Kombëtares gjatë qëndrimit në kampin e Botërorit 2026 në Amerikën e Veriut, shkruan 20 min.ch, transmeton albinfo.ch.

Tekniku 51-vjeçar ka bërë të ditur se lojtarët do të kenë liri të caktuara gjatë turneut, por gjithçka do të zhvillohet brenda kornizave të disiplinës dhe përgjegjësisë. Ai ka sqaruar se familjarët do të mund t’i vizitojnë futbollistët vetëm në periudha të caktuara, ndërsa ekipi do të funksionojë sipas rregullave të përcaktuara nga stafi teknik.

Yakin ka theksuar se synimi është ruajtja e atmosferës pozitive brenda grupit, pa krijuar kufizime të panevojshme për lojtarët. Sipas tij, ekuilibri mes lirisë individuale dhe fokusit te objektivat sportive është çelësi për një paraqitje të suksesshme në Botëror.

Zvicra hyn në Botërorin 2026 me ambicie të mëdha pas një fushate të suksesshme kualifikuese. Yakin ka deklaruar më herët se synimi i ekipit është të realizojë paraqitjen më të mirë në historinë e Kombëtares zvicerane në një Kampionat Botëror.

Kombëtarja zvicerane ndodhet në Grupin B të Botërorit së bashku me Bosnjë e Hercegovinën, Kanadanë dhe Katarin, ndërsa përgatitjet finale po zhvillohen sipas planit të stafit teknik.

---